Дар шаҳри Тунсии Ҷумҳурии Мардумии Чин нишасти сеюми вазирони ҳамсоякишварҳои Афғонистон баргузор шуд, ки дар он ҳайати Ҷумҳурии Тоҷикистон таҳти роҳбарии вазири адлия Музаффар Ашуриён ширкат намуд. Дар ин бора АМИТ «Ховар» бо истинод ба Вазорати корҳои хориҷӣ хабар медиҳад.

- Тоҷикистон имконоти логистикии худ, аз ҷумла шаш пул дар марз бо Афғонистонро, барои интиқоли борҳои башардӯстона аз ҷониби созмонҳои байналмилалӣ ба Афғонистон фароҳам оварда, илова бар ин, интиқоли неруи барқро ба ин кишвар идома медиҳад. Мо омодаем минбаъд низ ба ин раванд ҳамаҷониба мусоидат намоем, то заминаҳои зарурӣ барои истиқрори сулҳу субот, амният ва эҳёи иҷтимоию иқтисодии онро дар сарзамини азияткашидаи Афғонистон фароҳам оварем, - гуфт М. Ашуриён.

Дар нишаст изҳороти муштарак қабул шуд. Дар он дар баробари пешниҳодҳои дигари Тоҷикистон, ташаббуси Асосгузори сулҳу ваҳдати миллӣ - Пешвои миллат, Президенти кишвар муҳтарам Эмомалӣ Раҳмон ҷиҳати таъсиси «камарбанди амниятӣ» дар атрофи Афғонистон дарҷ ёфт.

 

 

Хуҷанд. 165 000 сомонӣ грант барои занони ҳунарманд ва эҷодкор

Мақомоти иҷроияи ҳокимияти давлатии шаҳри Хуҷанд озмуни «Гранти раиси шаҳр оид ба дастгирӣ ва рушди фаъолияти соҳибкории занони ҳунарманд ва эҷодкор барои соли 2022»-ро эълон намуд, ки аз 40 грант иборат буда, маблағи умумии он беш аз 165 ҳазор сомонист. Дар ин бора Мақомоти иҷроияи ҳокимияти давлатии шаҳр хабар дод.

Грантҳо барои дастгирӣ ва рушди фаъолияти соҳибкории занони ҳунарманд ва эҷодкор пешбинӣ шудаанд. Аз ҷумла, 5 грант дар ҳаҷми 8 ҳазор сомонӣ, 10 грант дар ҳаҷми 5 ҳазор сомонӣ ва 25 грант дар ҳаҷми 3  ҳазор сомонӣ мебошанд.

 

 

Иштироки 8 паҳлавони тоҷик дар мусобиқаи «Antalya Grand Slam 2022»

Аз  1 то  3 апрел дар шаҳри Анталияи Туркия  мусобиқа  оид  ба намуди  гӯштии дзюдо -  «Antalya Grand Slam 2022» баргузор мешавад. Дар сабқат иштироки 535 варзишгар (319 мард, 216 зан) аз 65 давлат дар назар аст, - иттилоъ медиҳад Федератсияи дзюдои Тоҷикистон.

Дар ин нерусанҷӣ дастаи  мунтахаби дзюдои  Тоҷикистон дар ҳайати 8 варзишгар: Меҳрзод Сӯфиев, Абубакр Шеров, Шаҳбоз Саидаброров, Сомон Маҳмадбеков, Комроншоҳ Устопириён, Ҷаҳонгир Маҷидов, Абубакри Акобир, Темур Раҳимов ширкат мекунад.

Қувваозмоиҳо дар ҳафт вазн миёни мардҳо ва ҳафт вазн миёни бонувон сурат мегиранд. Ғолибону ҷоизадорон дар баробари медал бо ҷоизапулӣ низ қадр мегарданд – ҷойи аввал 5000 евро, дуюм 3000 ва сеюм 1500 евро.

 

Лашкар ШАРИФЗОДА, “Ҷумҳурият”