Дар ҳошияи табрикоти Президенти Ҷумҳурии Тоҷикистон ба муносибати фарорасии моҳи шарифи Рамазон

 

Боиси ифтихор ва сарфарозист, ки Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ҳамасола шаҳрвандони кишварро ба муносибати фарорасии моҳи шарифи Рамазон табрик мекунанд.

Ин аст, ки, дар ҳақиқат, соҳиб-ихтиёрии давлатӣ дар баробари бунёди давлати миллӣ, эҳёи фарҳанги миллӣ, сулҳу субот ва ваҳдати миллӣ ба эҳёи арзишҳои динӣ ва ормонҳои таърихии миллат мусоидат кард.

Дар замони соҳибистиқлолӣ бо ташаббуси Президенти Ҷумҳурии Тоҷикистон бо мақсади ба низом даровардани баъзе расму оинҳои мардумӣ, ҷиҳати ҳимояи манфиатҳои молии шаҳрвандон ва тарбияи дурусти насли наврас қонунҳои Ҷумҳурии Тоҷикистон «Дар бораи танзими анъана ва ҷашну маросим» ва «Дар бораи масъулияти падару модар дар таълиму тарбияи фарзанд» қабул гардиданд, ки омӯзишу риояи онҳо андешаи одамро сайқал ва ақли ӯро таҳрик медиҳад.

Бо фарорасии сулҳу оромӣ, бо супориши Пешвои миллат аз ҳисоби буҷети давлат ва Фонди эҳтиётии Президент чопи китобҳои илмӣ, ахлоқӣ ва эътиқодии фарҳанги исломӣ ҷудо гардида, садҳо асарҳои гаронбаҳои таърихӣ чоп ва дастраси мардуми кишвар гардонда шуданд. Аз ҷумла, китоби «Тоҷикон» -и Бобоҷон Ғафуров, ки ба ҳар як оила дастрас карда шуд ва аз он ғизои маънавӣ мегиранд. Ҳадафи асосӣ, бо ин васила мардумро ба худҷӯиву худрасӣ ва худшиносии маънавӣ мутаваҷҷеҳ сохта, онҳоро ба худогоҳии миллӣ расондан аст, то ки заминаи тафаккури мардум, аз ҷумла ҷавонон, тоҷикӣ гардад.

Тавассути табрикот Сарвари давлат таъкид ба он доранд, ки хайру некӣ дар вуҷуди инсон аз донишмандиву доништалабӣ ҳосил мешавад. Дониш ва хайру саховат муҳаббат ба миён меорад, дилҳоро бо ҳам мепайвандад ва мардумро дар ин давраи ҳассостарину душвортарини таърихӣ муттаҳиду сарҷамъ мекунад. 

Таҷрибаи зиндагӣ собит менамояд, ки равандҳои иқтисодӣ ва иҷтимоиву сиёсӣ дар ҳар давраи таърих дар назди инсоният вазифаҳои нав мегузорад. Давлат ва Ҳукумат низ ҳамеша дар сари масъалаҳои муҳими ҷомеа фикр мекунад, мардумро сари вақт аз печу тоби он хабар медиҳад ва роҳи ҳалли онҳоро пешниҳод менамояд, то ки ҳушёрии мардум фаъолтар ва зиндагии онҳо бо ривоҷу равнақ бошад. Чунончи, Президенти Ҷумҳурии Тоҷикистон бо амалкарди оқилона ва ҷасорати камназир миллатро аз бемории сирояти нави коронавирус раҳонданд.

Ба таври қатъӣ ва, яқинан, метавон гуфт, ки Президенти муҳтарами мамлакат даъват ба он доранд, ки мардум дар кишти баҳорӣ бо истифодаи тухмиҳои аълосифат ҳарчи бештар ғалла, зироатҳои лӯбиёгӣ, маккадон, шолӣ кишту истеҳсол карда, захираи дусолаи маводи зарурии ғизоӣ дошта бошанд.  

Аз ҷумла, хешу ақрабоям дар деҳот кор мекунанд ва зиндагии хоксоронаи худро бо меҳнати ҳалол пеш мебаранд. Дар партави роҳнамоии пайвастаи Сарвари давлат солҳои охир аз заминҳои наздиҳавлигӣ ва президентӣ самаранок истифода бурда, бо истифода аз кишти такрорӣ ҳосили фаровон ба даст меоранд ва захираи хуби маҳсулот низ дар ганҷурхона нигоҳ медоранд.  Аз дороиву оромии хешовандон мо низ бенасиб нестем ва шукронаи онро дорем, ки хушҳолона умр ба сар мебарем.

Бинобар ин, аз номи аҳли оила ва наздиконамон ба Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои ғамхориву роҳнамоии хирадмандона, гиротар кардани ақлҳо, пойдории сулҳу оромӣ ва табрикоти самимӣ аз дилу ҷон сипос мегӯем.

 

Одинашоҳ ВАЛИЗОДА, 

омӯзгор, сокини шаҳри Душанбе