Мир24. Сарвазири Арманистон Никол Пашинян аз Президенти Россия Владимир Путин даъват кард, ки дар нимаи дуюми сол дар чаҳорчӯбаи нишасти Шурои амнияти дастаҷамъии СААД ба Ереван сафар намояд. Даъват қабул шуд, - гуфта мешавад дар изҳороти якҷояи роҳбарон ҳангоми гуфтушуниде, ки дар Ново-Огарёво барпо гардид. 

Ин мулоқот ба 30-юмин солгарди барқарории равобити дипломатӣ миёни кишварҳо рост омад. Ҷонибҳо ҳам ҷанбаҳои иқтисодии ҳамкорӣ ва ҳам масъалаҳои амниятӣ дар Қафқози Ҷанубиро баррасӣ намуданд. 

"Мо дар солҳои қаблӣ дар заминаи муносибатҳои ҳуқуқии худ 200 санад имзо кардем. Қариб дар ҳамаи соҳаҳо имкониятҳои хуб мавҷуданд. Иқтисодиёт яке аз пешқадамтарини онҳо маҳсуб мегардад",- гуфт Владимир Путин.

“Ба касе пӯшида нест, ки Россия дар таъмини субот ва амният дар минтақаи мо нақши калидӣ дорад ва ман бори дигар бояд нақши истисноии Шуморо дар оташбас ва амалиёти ҷангӣ дар Кӯҳистони Қариябоғ дар соли 2020 зикр созам”, - гуфт Сарвазири Арманистон.

 

 

Ишораи Чин ба оқибатҳои манфии боздоштани захираҳои давлатӣ

Известия. Намояндаи доимии Чин дар СММ Чжан Сзюн дар ҷаласаи Шурои амнияти СММ изҳор дошт, ки боздоштани захираҳои давлатҳо ба суботи иқтисодӣ таҳдид мекунад, ин тадбирҳо бояд қатъ шаванд.   

"Маҳдуд намудани худсаронаи захираҳои асъор низ боиси поймол шудани соҳибихтиёрии давлатҳо мегардад. Ин амалия пояҳои суботи иқтисодии ҷаҳонро вайрон карда, номуайянӣ ва хатарҳоро барои муносибатҳои байналмилалӣ ба вуҷуд меорад. Аз чунин таҷриба бояд ҳарчи зудтар даст кашид", - гуфт Чжан. Илова бар ин, ҳама ҷонибҳои даргири атрофи Украина, ба ақидаи ӯ, бояд ба таври қатъӣ принсипҳои ҳуқуқи башарии байналмилалиро риоя, ба тахлияи амни мардуми осоишта мусоидат кунанд ва ба онҳо ёрии башардӯстона расонанд.

 

 

Ҷонибдории Бразилия аз ширкати Россия дар нишасти G20

ТАСС. Вазири корҳои хориҷии Бразилия Карлос Алберто Франко Франс гуфт, ки Ҳукумати ин кишвар аз ширкати Россия дар нишасти G20 пуштибонӣ мекунад.

«Ман дар ин масъала бо ҳамтои худ, роҳбари Вазорати корҳои хориҷии Индонезия (кишвари раиси G20) суҳбат намуда, имкон пайдо кардам, ки мавқеи худро возеҳ баён созам. Мо воқеан, мехоҳем, ки Россия тавонад дар нишасти вазирони G20 ва, албатта, дар нишасти роҳбарон моҳи ноябр ширкат кунад», - гуфт вазир. Ба гуфтаи вай, хориҷ шудани Россия барои дарёфти роҳи ҳалли «мушкилоти мубрам, ки ҳоло мо рӯ ба рӯ ҳастем» мусоидат наменамояд. 

 

 

Лукашенко ваъда дод, ки ба вайронкунандагони сулҳу субот ҷавоби сазовор медиҳад

Газета. ру. Президенти Беларус Александр Лукашенко дар ҷаласа оид ба масъалаи таъмини тартиботи ҳуқуқӣ гуфт, ки ӯ қудрат ва имкони кофӣ  дорад, то ба  ҳар нафаре, ки тасмим мегирад, сулҳу оромии кишварро халалдор созад, ҷавоби сазовор диҳад. 

Роҳбари Беларус афзуд, ки дар сурати мавҷуд набудани ҳамбастагӣ метавонад вазъияти дигаре ба миён ояд. Сарвари давлат ба унвони мисол амалиёти ҷангӣ дар Украинаро мисол  оварда, афзуд, ки рух додани чунин ҳолатро дар қаламрави Беларус намехоҳад. Ӯ таъкид кард, ки кори блоки интизомиро дар як қатор бахшҳо нокифоя медонад. «Беҳуда нест, ки ман шуморо бори аввал дар чунин вохӯрӣ ҷамъ кардам. Пас аз ин дидор талабот сахт мешавад. Мо нақши додситонӣ ва тамоми сохторҳои дигарро пурзӯр хоҳем кард, ба мо кори муназзам ва андешамандонаи ҳаррӯза лозим аст», - гуфт Президент.