Дар Академияи миллии илмҳои Тоҷикистон бо ҳузури  Эмомалӣ Насриддинзода, ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, Матлубахон Сатториён, муовини Сарвазири кишвар, бахшида ба Рӯзи илм ҷаласаи тантанавӣ доир шуд. Фарҳод Раҳимӣ, президенти АМИТ, илму маорифро аз соҳаҳое арзёбӣ намуд, ки дар  меҳвари таваҷҷуҳи Ҳукумати ҷумҳурӣ қарор доранд.

- Пешвои миллат муҳтарам Эмомалӣ Раҳмон пайваста талош менамоянд ва имконият  фароҳам меоранд то  дар низоми илми кишвар таҳаввулоти ҷиддӣ рӯйи кор омада,  мақоми илму маърифат дар  ҷомеа боз ҳам боло равад.  Натиҷаи ҳамин дастгириҳост, ки дар Академияи миллии илмҳо беш аз 2000 корманд ва 1500  ҷавони унвонҷӯ дар самтҳои афзалиятноки илм корҳои таҳқиқотӣ анҷом медиҳанд, - гуфт  Фарҳод Раҳимӣ.

Таъкид шуд, ки таҷлили Рӯзи илм баёнгари он аст, ки  фазои маърифативу  маънавии кишвари соҳибтамаддуни мо  дар ҳазорсолаи нави таърихӣ рӯ ҷониби падидаҳои илмиву фарҳангӣ дорад.

Матлубахон Сатториён иброз дошт, ки натиҷаҳои илмии  замони истиқлоли олимони тоҷик  гувоҳи устувор гардидани мавқеи илм дар иқтисодиёт ва иҷтимоиёти кишвар  мебошад. Ин муддат дар соҳаҳои илмҳои дақиқ, техникӣ, тиббӣ, кишоварзӣ, ҷомеашиносӣ натиҷаҳои назаррас ба даст омада,  таҳия ва чопи китоби шашҷилдаи «Таърихи халқи тоҷик»  ва сеҷилдаи  «Таърихи фалсафаи тоҷик  аз замонҳои қадим то имрӯз», «Этногенез ва таърихи этникии тоҷикон», фарҳангҳои гуногуни тафсириву дузабона, донишномаҳо, баррасии таърихи ҳуқуқ ва давлатдории тоҷикон, ки солҳои охир анҷом ёфтанд, барои рушди ҷомеа, боло бурдани ҳисси ватандӯстиву худогоҳии миллии мардуми кишвар судманданд. 

Ихтироъкориву навоварӣ ва тақвият бахшидани робитаи илму  истеҳсолот аз ҷумлаи мавзуъҳои дигаре буданд, ки дар ҳамоиш баррасӣ гардиданд. Доир ба ин масъала таъкид шуд, ки ихтироъкориву навоварӣ бояд ҳамеша дар маркази диққати роҳбарони пажӯҳишгоҳҳои АМИТ ва  академияҳои соҳавӣ қарор бигиранд.

Ҷалби ҷавонон ба илм ва тарбияи кадрҳои  илмӣ низ аз мадди назари аҳли нишаст дур намонд. «Мо бояд олимони насли даврони истиқлолро омода карда, дар ташаккули тафаккур  ва  ҷаҳонбинии онҳо ёрӣ расонем», - афзуд Матлубахон Сатториён.

Чанде аз олимон барои саҳми назаррас дар рушди илм ва дастовардҳои илмӣ бо ҷоизаҳои АМИТ ва  нишони Аълочии маориф ва илм қадр гардиданд. 

 

Фарзона ФАЙЗАЛӢ, 

«Ҷумҳурият»