Дар сарраёсати молияи вилояти Хатлон аз фаъолияти семоҳаи соҳа натиҷагирӣ карда шуд. Дар ҷаласа муовини вазири молия Маҷидӣ Юсуф Хайрулло, сардори сарраёсати молияи вилояти Хатлон Иззатуллозода Ҳабибулло Иззатулло ва сардорони раёсатҳои молияи 25 шаҳру ноҳияҳои вилоят иштирок намуданд.   

Ҷаласаро Иззатуллозода Ҳабибулло оғоз бахшида, оид ба натиҷаҳои иҷрои буҷети маҳаллии шаҳру ноҳияҳои вилоят дар семоҳаи аввали соли 2022 маълумот дод. Ӯ иброз дошт, ки иҷрои нақшаи андозҳо ва пардохтҳои буҷети маҳаллӣ дар семоҳаи аввали соли ҷорӣ аз рӯйи контингенти умумӣ ба андозаи 102% ва аз ҳисоби даромадҳои худӣ низ ба андозаи 102% таъмин шуда, ба буҷет 398,3 млн сомонӣ ворид гардид, ки нисбат ба нақша 7,8 млн сомонӣ ва нисбат ба ҳамин давраи соли гузашта 39,9 млн сомонӣ зиёд аст. 

Ба гуфтаи Иззатуллозода Ҳабибулло, ба ҳолати 1 апрели соли ҷорӣ бақияпулии қарзи андози иҷтимоии ташкилоту муассисаҳои буҷетӣ бо назардошти қарзҳои қаблӣ 50,5 млн сомониро ташкил медиҳад. 

Дар ин давра, ба соҳаҳои хоҷагии халқи вилоят бо назардошти маблағҳои мақсадноки ҷумҳуриявӣ 519,5 млн сомонӣ равона  шудааст, ки 91 дарсади нақшаи пешбинишударо ташкил медиҳад, ки аз ин 89,1 дарсад маблағҳои буҷетӣ ба соҳаҳои иҷтимоиёт  рост меоянд.   

 Зикр шуд, ки давоми се моҳи аввали соли 2022 шуъбаи аудити дохилӣ ва назоратии сарраёсати молияи вилоят ва мутахассисони раёсатҳои молияи  шаҳру ноҳияҳои вилояти Хатлон дар 112 ташкилоту муассисаҳои  буҷетӣ оид ба истифодабарии мақсадноки маблағҳои буҷетӣ таҳлилҳои интихобӣ гузаронданд. 

Дар натиҷа, ба маблағи 2,9 млн сомонӣ камбудиҳо ошкор гардидаанд, ки аз ин 2,4 млн сомонии онро зарари молиявӣ ташкил медиҳад.  Аз маблағи ошкоркардашуда 2,3 млн сомонӣ, аз ҷумла 1,4 млн сомонӣ ба буҷет ва 926,0 ҳазор сомонӣ ба фоидаи корхонаҳо, барқарор карда шудааст.

Дар ҷаласа, инчунин, муовини вазири молия Маҷидӣ Юсуф Хайрулло ва баъзе масъулони раёсатҳои молияи шаҳру ноҳияҳои вилоят суханронӣ намуда,  дастоварду камбудиҳо ва паҳлуҳои гуногуни соҳаро мавриди таҳлилу баррасӣ қарор доданд. 

  

Зокир ҲАСАН, "Ҷумҳурият"