Дар шаҳри Тошканд таҳти раёсати Ӯзбекистон нишасти дувоздаҳуми роҳбарони ниҳодҳои салоҳиятдори кишварҳои узви СҲШ дар умури мубориза бо гардиши ғайриқонунии маводи мухаддир баргузор шуд. Дар он намояндагони идораву агентиҳои марбутаи кишварҳои узви СҲШ, аз ҷумла Тоҷикистон, Ҳиндустон, Покистон, Қазоқистон, Қирғизистон, Россия ва Чин иштирок карданд.

Гуфта шуд, ки гардиши ғайриқонунии маводи мухаддир, паҳну пахши он, воситаҳои синтетикӣ, моддаҳои психотропӣ ба амнияти минтақавӣ ва суботи он таҳдиди ҷиддӣ ба бор меорад.

- Бад шудани авзоъ дар кишвари ҳамсояи Афғонистон ва афзоиши маводи мухаддир боиси он шудааст, ки ин мавзуъ хеле муҳим ва ҳаллаш ногузир боқӣ монад. Барои ҳамин Созмони ҳамкории Шанхай ҳамчун созмони бонуфуз ва таъсиргузор бояд дар мубориза бо маводи мухаддир ва ҷилавгирӣ аз гардиши ғайриқонунии он нақши муҳим бозад. Инчунин, ҳамоҳанг сохтани фаъолияти неруҳои зидди маводи мухаддири кишварҳои узви он, талошҳои муборизаи дастаҷамъона алайҳи онро беш аз пеш таҳким бахшанд, - гуфт мудири Кумитаи иҷроияи Сохтори минтақавии зиддитеррори СҲШ Руслан Мирзоев.

Вай афзуд, ки назорати маводи мухаддир ва ҳамаи чорабиниҳо ҷиҳати бартараф намудани паҳни он дар шакли СҲШ дар чаҳорчӯбаи Созишномаи байнидавлатии кишварҳои узви СҲШ оид ба мубориза бо гардиши ғайриқонунии маводи мухаддир, воситаҳои психотропӣ ва прекурсорҳо сурат мегирад, ки 17 июни соли 2004 дар шаҳри Тошканд ба имзо расидааст.

- Тоҷикистон нигаронии ҷомеаи ҷаҳониро нисбат ба афзоиши маводи мухаддир ва таҳдидҳои терроризми байналмилалӣ ба амнияту субот  хеле хуб дарк мекунад. Зеро аз рӯи мавқеи ҷуғрофӣ кишвари мо дар сафи пеши масири интиқоли маводи мухаддир аз Афғонистон ба соири кишварҳои ИДМ ва аз тариқи он ба мамолики дигар воқеъ гаштааст. Дар муддати қариб се даҳсолаи охир Тоҷикистон тамоми чораҳоро пиёда мекунад, ки аз интиқоли маводи мухаддир ва гардиши ғайриқонунии он ҷилавгирӣ намояд, - изҳор кард муовини директори Агентии назорати маводи нашъаовари назди Президенти Ҷумҳурии Тоҷикистон Раҳмоналӣ Раҳимзода.

Ба таъкиди ӯ, барои Тоҷикистон СҲШ майдоне ба шумор меравад, ки дар фазои он метавон ба таври дастаҷамъӣ алайҳи гардиши ғайриқонунии маводи мухаддир ва терроризми байналмилалӣ беамон мубориза бурд. 

- Мушкилоте, ки гардиши ғайриқонунии маводи мухаддир ба миён овардааст ва ба суботу амнияти минтақа сахт таъсир мегузорад, муборизаи дастаҷамъонаро тақозо менамояд. Инро ҳамаи кишварҳои узви СҲШ низ хеле хуб дарк менамоянд. Фирк мекунам, ки ин нишаст маҳз барои ҳосил шудани натиҷаҳои бештар дар ин росто мусоидат хоҳад кард. Садорати мубориза бо маводи мухаддир ва ҷинояткории СММ барои ҳамкорӣ ва расондани ҳар гуна кумакҳо омода мебошад,-гуфт намояндаи ин созмони минтақавӣ дар Осиёи Марказӣ Ашита Миттал.

Ба гуфтаи намояндаи Дафтари назорат бар маводи мухаддири Ҳиндустон Сатя Нараян Прадхан кишвараш мисли давлатҳои дигари узви СҲШ дар масири транзитӣ қарор дорад. Аз ин рӯ, аз тарафи қочоқбарон Ҳиндустон ба далели доштани роҳҳои баҳрӣ барои интиқоли транзитии маводи мухаддир хеле фаровон истифода мешавад.

- Соли гузашта кормандони ниҳодҳои ин кишвар 7 ҳазору 600 кило маводи мухаддир, аз ҷумла 4,5 тонна ҳероин мусодира кардаанд. Маълум шуд, ки Афғонистон ҳанӯз ҳамчун манбаи ягонаи истеҳсоли  маводи мухаддир дар минтақа ба шумор меравад, - изҳор кард Нараян Прадхан.

Иштирокчиён дар охир протокол имзо карданд. Гуфта шуд, ки нишасти навбатӣ нимаи аввали соли 2023 дар Ҳиндустон баргузор хоҳад шуд.

 

Мирасрор АҲРОРОВ,

барои “Ҷумҳурият”, шаҳри Тошканд