Дар ҷаласаи машваратии  назди  раиси  ноҳияи Ванҷ Одинашо Мардзода  натиҷаҳои семоҳаи аввали  соли  2022-ро таҳлил намуда, ба бурду бохти ҳар сардори идораву муассиса баҳои мушаххас доданд. Фаъолияти сардухтури беморхонаи марказии ноҳия Шовайсиддин Шонасриддиновро ҳамчун намунаи хизмати содиқона ба мардум ва ибратомӯз  муаррифӣ карданд. Раиси ноҳия гуфт, ки кори шоистаи чунин сарварони идораву муассисаҳо, сазовори ташвиқ ва тарғиб мебошад.

Баъди чунин баҳои баланд ба касалхонаи марказии ноҳияи Ванҷ рафтем. Маълум гардид, ки сартабиби ин муассиса аз рӯи одат  саҳарии барвақт ба кор омада, тамоми ҳуҷраҳои табобатиро, ки дорои  158 кат мебошанд, аз назар мегузаронад. Аз ҳолу аҳволи беморон пурсон мешавад, баъд бо кормандон машварати кӯтоҳ намуда, корафтодагонро, ки барои ташхис ва маслиҳат наздаш меоянд, қабул мекунад. Ҳамчун ҷарроҳи пуртаҷриба ба кормандони шуъбаи ҷарроҳӣ кумак расонда, ҷарроҳиҳои мураккабро худаш мегузаронад.

Рӯзи истироҳатӣ низ Шонасриддинов хеле серкор  буд. Ӯ соате вақт пайдо намуда бо мо ҳамсуҳбат шуд.  

Вақте бо шарҳи ҳоли мухтасари табиб  шинос  шудем, маълумамон гардид,  ки  ҷуғрофия ва ё чорсуи  фаъолияти табибиашон хеле васеъ будааст. 

- Соли 1988  баъди  таҳсил дар Институти  тиббии пойтахт  ба раёсати тандурустии  Вилояти Мухтори Кӯҳистони Бадахшон  роҳхат гирифтам. Зиёда аз як сол дар  шуъбаи ҷарроҳии касалхонаи вилоятӣ кор кардам. Аз табибони  номдор таҷриба омӯхтам. Ҳамон солҳо дар ноҳияи Ванҷ духтурони ҷарроҳ намерасиданд. Бо хоҳиши  роҳбарони  раёсати тандурустии вилоят ба ноҳияи Ванҷ фиристода шудам. То соли 1994 дар зодгоҳам  ҳамчун духтури ҷарроҳ  иҷрои вазифа кардам.

Пасон, дар  ноҳияи Мурғоб то он вақте  ки духтурони ҷарроҳи маҳаллӣ ба кор наомаданд,  хизмати  мардуми ин диёрро   сидқан ба ҷо овардам. Ҳамчунин, дар хотир дорам, ки  дар солҳои нахустини истиқлолият   Қувваҳои Мусаллаҳи кишвар ба табибон, пеш аз ҳама, духтурони ҷарроҳ   сахт эҳтиёҷ дошт.  Бо хоҳиши худам   тайи зиёда аз  ду сол  дар госпитали  отряди сарҳадии шаҳри Хоруғ  иҷрои вазифа кардам. Барои такмили  маҳорати касбиам аз соли 2004 то соли 2021 дар  беморхонаи  рақами 3, шаҳри Душанбе духтури ҷарроҳ ва сипас, мудири шуъбаи ҷарроҳии  ин муассисаи табобатӣ кор кардам.

Инак қариб як сол мешавад, ки ба сифати сардухтури касалхонаи марказии ноҳияи Ванҷ ифои вазифа дорам,  -  мегӯяд табиб. 

Дар ин давра беморхонаи марказии ноҳия соҳиби дастгоҳи рентгении рақамӣ, оксигенераторҳо, дастгоҳҳои сунъии нафаскашӣ, ки дар муолиҷаи беморони ба коронавирус дучоршуда самаранок истифода бурда шуданд,  инчунин, таҷҳизоти  ташхиси дил ва  се  мошини ёрии таъҷилӣ низ,  гардидем. Яке аз  мошинҳои ёрии таъҷилӣ ва дигар асбобу анҷомҳо ва миқдори зиёди дорувориро ба беморхонаи минтақавии деҳаи Мотравни Ҷамоати деҳоти Язгулом  додем. 

Ҳоло дар бемористони мо 145  корманди зинаҳои гуногун фаъолият дорад. Дар  давраи кориам  Бибимо Пирова  ва Муҳсин Карамшоев, ки  тариқи Квотаи  президентӣ дар Донишгоҳи тиббии шаҳри Душанбе ба номи Абуалӣ ибни Сино таҳсил мекарданд, баъди хатми он ба зодгоҳашон баргаштанд. Онҳо ва боз  даҳ нафар  хатмкунандагони коллеҷу омӯзишгоҳҳои  тиббӣ дар касалхона ва  дигар  муассисаҳои  муолиҷавӣ пурмаҳсул  заҳмат мекашанд. Ҳамчунин, дар    10 маркази саломатӣ ва 22 бунгоҳи тиббӣ кормандони соҳа вазифаи худро бошарафона ба ҷо меоранд. Марҳилаи якум ва дуюми  ваксинагузаронии  аҳолии ноҳияро зиёда аз 98 фоиз ба иҷро расонданд. Ҳоло бошад, марҳилаи сеюми эмкуниро барои  пешгирии коронавирус  зиёла аз 70 фоиз ба иҷро расондаем. Аз ҳама муҳимаш дар  чор моҳи соли  равон  ягон сокини  ноҳия  мубталои ин беморӣ нагардидааст, - иброз дошт Ш. Шонасриддинов.  

Бинои шуъбаи касалиҳои сироятӣ, ки тайи се сол  дар ҳолати  вайронӣ ва корношоямӣ қарор дошт,  таъмири асосӣ шуд. Ҳамчунин, биноҳои   шуъбаҳои  ҷарроҳӣ,  таваллудхона, касалиҳои дарунӣ ва бачагона,   қисмати берунии  тамоми иморатҳои  бемористон  аз таъмири ҷорӣ баровара шуданд.  Барои  беморону  табибон макони истироҳат ва дамгирӣ сохтанд.  Бо кумаки  Мақомоти иҷроияи маҳаллии ҳокимияти давлатии ноҳия, соҳибкорону  тоҷирон ва дигар шахсони хайрхоҳ ва ҳиматбаланд  қариб 600 метр роҳравҳои   бемористон   бетонпӯш  гардид. 

 

Муҳаммадзоиршо 

ШАРИФЗОДА, «Ҷумҳурият»,

Сироншоҳи ДИЛОВАР, рӯзноманигор