Бо чунин унвон Кумитаи иҷроияи марказии Ҳизби Халқии Демократии Тоҷикистон ва Кумитаи иҷроияи ҲХДТ дар вилояти Хатлон 10 - 11 июни соли равон бахшида ба 25-солагии Рӯзи Ваҳдати миллӣ дар шаҳри Бохтар Конфронси байналмилалии илмӣ-амалӣ баргузор менамоянд, - хабар дод роҳбари маркази матбуот ва таҳлилии дастгоҳи КИМ ҲХДТ Илҳомҷон Ҳамидиён ба АМИТ «Ховар».

Конфронс дар шакли мустақим ва фосилавӣ доир гардида, чор бахши асосӣ - «Сиёсатшиносӣ ва идоракунӣ», «Иқтисодиёт ва энергетика», «Ҳуқуқ, амнияти миллӣ ва муносибатҳои байналмилалӣ» ва «Кишоварзӣ ва саноатикунонӣ»-ро дар бар мегирад.

Дар он олимон, муҳаққиқон, ходимони сиёсӣ ва шахсоне, ки ба корҳои илмию тадқиқотӣ машғул мебошанд, метавонанд ширкат варзанд. Иштирок тариқи пешниҳоди дархост то санаи муқарраршуда тасдиқ мешавад.

 

 

Вохӯрии вазирони корҳои хориҷии кишварҳои Осиёи Марказӣ ва Россия

Вазири корҳои хориҷӣ Сироҷиддин Муҳриддин дар вохӯрии панҷуми вазирони корҳои хориҷии кишварҳои Осиёи Марказӣ ва Федератсияи Россия дар қолаби видеоӣ ширкат варзид. 

Роҳбарони мақомоти корҳои хориҷӣ масъалаҳои таъмини амнияти минтақавӣ дар шароити афзоиши чолишҳову таҳдиҳо ва вазъи мураккаб дар Афғонистонро баррасӣ карданд.

Ба иттилои Вазорати корҳои хориҷӣ, инчунин, дурнамои ҳамкориҳои бисёрҷониба оид ба ҷонибдории ислоҳот ва тақвияти рушди пойдори минтақа, иқдомҳо роҷеъ ба таъмини амнияти озуқаворӣ муҳокима шуданд.

 

 

Мулоқоти Прокурори генералӣ бо муовини Дабири кулли СММ

Дар қароргоҳи СММ дар шаҳри Ню-Йорк мулоқоти Прокурори генералии Ҷумҳурии Тоҷикистон Раҳмон Юсуф бо муовини Дабири кулли СММ, роҳбари Дафтари зиддитеррористии СММ Владимир Воронков доир гашт.

Ба иттилои Вазорати корҳои хориҷӣ, онҳо доир ба масълаҳои татбиқи “Стратегияи миллии мубориза бар зидди терроризм ва ифротгароӣ барои солҳои 2021-2025”, таҳдиду чолишҳои амниятӣ, густариши ҳамкории Тоҷикистон бо ин ниҳоди зиддитеррористӣ ва иқдомҳои муштарак дар доираи “Раванди Душанбе” оид ба мубориза бо терроризм суҳбат доштанд.

Лашкар ШАРИФЗОДА, "Ҷумҳурият"