Вазири корҳои дохилӣ Рамазон Раҳимзода аз шароити хизматии сарбозону афсарони қисми низомии «Н»-и раёсати қӯшунҳои дохилӣ дидан кард.

Вазир аз имконоту шароити фароҳамшуда изҳори қаноатмандӣ карда, масъулонро вазифадор намуд, ки ба обутоби ҷисмонии сарбозону афсарон ва тамринҳои пайваста таваҷҷуҳи хосса зоҳир созанд.

Ба иттилои вазорат, Рамазон Раҳимзода, ҳамчунин, бо шароити касбомӯзии сарбозон шинос шуда, ҷиҳати соҳибкасб гардидани онҳо ба масъулон супоришҳои мушаххас дод.

 

 

Ҳафтаи аврупоии иммунизатсия дар Тоҷикистон 

Дар Муассисаи давлатии «Маркази ҷумҳуриявии иммунопрофилактика» бахшида ба оғози «Ҳафтаи аврупоии иммунизатсия дар Ҷумҳурии Тоҷикистон», мизи мудаввар бо иштироки муовини вазири тандурустӣ ва ҳифзи иҷтимоии аҳолӣ Абдухолиқ Амирзода, роҳбарони марказҳои саломатии шаҳри Душанбе, мутахассисони соҳа ва шарикони рушд доир гашт. 

Ҳафта аз 26 то 30 апрели соли 2022 дар давлатҳои Бюрои минтақавии аврупоии Созмони ҷаҳонии тандурустӣ қайд карда мешавад

Абдухолиқ Амирзода иброз дошт, ки чорабинии мазкур аз соли 2005  то кунун ҳамасола баргузор мегардад, ки мақсади асосии он баланд бардоштани маълумотнокии аҳолӣ оид ба моҳияти иммунизатсия дар самти нигоҳдории солимии сокинон мебошад.

Мавзуи имсолаи Ҳафтаи аврупоии иммунизатсия – «Умри дароз барои ҳама» мебошад. Ҳадафи он  бори дигар таъкид намудани моҳияти дастрасии одилонаю васеъ ба ваксинаҳое мебошад, ки барои таъмини умри дароз ва солимӣ ба ҳар як инсон мусоидат мекунад.

 

 

Сел дар Панҷакент ба 48 гектар замин ва 22 манзил зарар расонд

Бар асари борони пуршиддати  23 апрел  дар деҳаи Навободи Ҷамоати деҳоти Лоиқ Шералии шаҳри Панҷакент сел ба 48 гектар замин ва 22 манзили сокинон зарар расонд, - хабар медиҳад Кумитаи ҳолатҳои фавқулода ва мудофиаи гражданӣ.

Бар асари борони пуршиддат селроҳаи Заврон аз об пур шуда, лойқа пули деҳаро, ки дар километри 64 – уми роҳи мошингарди Айнӣ-Панҷакент воқеъ аст, пӯшонд ва роҳ муваққатан баста шуд. Бо ҷалби техника ва кормандони Вазорати нақлиёт роҳ тоза шуда, ҳаракати мошинҳо имконпазир гардид.

Мақомот барои тоза намудани хонаҳои истиқоматӣ ва қитъаҳои наздиҳавлигӣ ҳашари умумӣ бо ҷалби аҳолӣ ва техника ташкил кард.