Бо ташаббуси Бюрои минтақавии аврупоии Созмони ҷаҳонии тандурустӣ аз 24 то 30 апрел даври ҳабдаҳуми  Ҳафтаи аврупоии иммунизатсия гузаронда мешавад. Тоҷикистон ташаббуси Бюроро ҷонибдорӣ намуда, дар доираи Ҳафтаи иммунизатсия зери шиори «Умри дароз барои ҳама» миёни аҳолии манотиқи гуногуни кишвар чорабиниҳои гуногун роҳандозӣ менамояд. 

Дар ин бора зимни нишасти матбуотии Маркази ҷумҳуриявии иммунопрофилактикаи назди Вазорати тандурустӣ ва ҳифзи иҷтимоии аҳолии ҷумҳурӣ, ки бо ҳузури Абдухолиқ Амирзода, муовини вазири тандурустӣ ва ҳифзи иҷтимоӣ, Виктор Олшавский, сардори намояндагии Созмони ҷаҳонии тандурустӣ дар Тоҷикистон, баргузор гардид, иттилоъ доданд.

Мақсад аз роҳандозии чорабиниҳо баланд бардоштани дониши аҳолӣ оид ба аҳамияти эмкунии кӯдакон ва бо ин роҳ,  ҳимояи онҳо аз бемориҳои сироятӣ арзёбӣ гардид. 

Коршиносон ваксина ва иммунизатсияро кашфиёти муҳим шумурда, таъкид доштанд, ки барои ҳифзи аҳолӣ аз бисёр бемориҳои сироятӣ мусоидат менамояд. Ба шарофати ваксинаҳо қисми зиёди кӯдакон, наврасон ва калонсолон зидди бемориҳои гуногуни сироятӣ, аз ҷумла сурхча, гулафшон, гулузиндонак, ки қаблан марговар буданд, масуният пайдо менамоянд. 

Файзалӣ Саидзода, директори Маркази ҷумҳуриявии иммунопрофилактика гуфт: «Вазорати тандурустӣ ва ҳифзи иҷтимоии аҳолии ҷумҳурӣ гузарондани иммунизатсияро зидди 11 намуди бемориҳои сироятӣ барои кӯдакон, аз ҷумла фалаҷ, гепатити В, сил, кабудсулфа, гулузиндонак, кузоз, сурхча, баногӯшак, гулафшон, тавсия медиҳад. Барои гирифтани вояи ваксина зидди ин бемориҳои сироятӣ, кӯдак бояд 6 маротиба дар муассисаи тиббии ҷойи зист эм шавад».

Абдухолиқ Амирзода  бошад, зимни суханронӣ пешгирии бемориҳои сироятиро бо истифода аз ваксина самаранок ва  дастрас шумурда,  таъкид дошт, ки ба воситаи иммунизатсия сатҳи бемориҳои сироятӣ паст ва ҳатто маҳв мегардад.

- Дар мубориза зидди бемориҳои сироятӣ пешравиҳои назаррас бошанд ҳам, хатари хуруҷи онҳо  пурра аз байн нарафтааст. Ба ин хотир, ташкил  ва роҳандозии чорабиниҳои профилактикӣ бояд сари вақт, мунтазам ва босифат анҷом бипазиранд. Кӯдакон бояд ҳатман тибқи тақвими миллии эмкунӣ ба иммунизатсия фаро гирифта шаванд. Волидоне, ки ин тақвимро риоя намекунанд ё эмкунии кӯдаконашонро ба таъхир мегузоранд, зери хатари сироят  қарор  доранд, - афзуд Амирзода.

Дар нишаст таъкид гардид, ки Ҳукумати кишвари мо барои сари вақт пешгирӣ намудани бемориҳои сироятӣ ва дастрасии осони мардум ба ваксинаҳо шароити мусоид фароҳам овардааст. Ҳоло эмкунии на танҳо кӯдакон бар зидди бемориҳои сироятӣ, балки калонсолон зидди COVID - 19 низ, ройгон мебошад.

 

Фарзона ФАЙЗАЛӢ, “Ҷумҳурият”