Шаҳзода Шарипова - хонандаи синфи 11-и МТМУ № 50 ба номи Шариф Каримови деҳаи Обҷувози шаҳри Истаравшан аст. Бо забонҳои русиву англисӣ озодона сухан мегӯяд. Ҳанӯз дар синфи панҷ таҳсил мекард, ки дар озмуну олимпиадаҳои шаҳриву вилоятӣ ва ҷумҳуриявӣ ширкат меварзид ва сазовори ҷойҳои намоён мешуд. Ҳангоми таҳсилаш дар синфи 10-ум дар номинатсияи “Адабиёти халқҳои ҷаҳон” ғолиби озмуни “Фурӯғи субҳи доноӣ китоб аст” дар шаҳри Истаравшан шуд ва дар олимпиадаи ҷумҳуриявӣ аз фанни забони русӣ сазовори ҷойи сеюм гардида буд.

Шаҳзода аз дастгириҳои раёсати маориф ва Мақомоти иҷроияи ҳокимияти давлатии шаҳри Истаравшан, вилоят ва Ҳукумати ҷумҳурӣ арзи сипос намуда, ният дорад, дар оянда дар пешрафти илму фарҳанг саҳми босазои хешро гузорад. 

Инак, бузургтарин ғолибият, муваффақ шудан ба орзуҳои деринааш насиби ӯ гашт. Мавсуф сазовори ҷойи аввал дар олимпиадаи фаннии хонандагон аз забони русӣ дар миқёси ҷумҳурӣ шуд ва бо дипломи дараҷаи аъло ва медали тилло аз ҷониби Вазорати маориф ва илми Ҷумҳурии Тоҷикистон сарфароз гардид. 

Шаҳзода аз ин ғолибият миннатдории худро, ба устодаш омӯзгори фанни забони русӣ Ойбибӣ Неъматова, омӯзгори гимназияи №5 Олга Алексеевна Тришедко ва маъмурияту кулли омӯзгорони муассиса, ки ба вай таълиму тарбия додаанд, баён дошт. 

 

Маъмурияти МТМУ № 50