Рустам Хоҷаев то моҳи июл дар мақомаш мемонад

Қаблан иттилоъ дода будем, ки Рустам Хоҷаев, сармураббии тими «Хуҷанд», пас аз бохти дастааш аз тими КМВА аз мақомаш истеъфо дод. 

Тавре 26 апрел сомонаи дастаи “Хуҷанд” навишт роҳбарияти даста истеъфои Рустам Хоҷаевро напазируфтааст. Тарафҳо ба мувофиқа расиданд, ки шартномаро то кушодашавии равзанаи гузариши тобистона дар Тоҷикистон (2 июл) идома диҳанд. 

 

 

 

Ҷорҷо Келлини корномаашро дар тими мунтахаб хотима медиҳад

 

Капитани тими миллии Италия Ҷорҷо Келлини эълон кард, ки корномаашро дар мунтахаб хотима медиҳад. Футболбози 37 - сола гуфтааст, ки бозии финалӣ миёни чемпиони Аврупо – Италия ва чемпиони Америкаи Ҷанубӣ – Аргентина, ки 1 июн дар варзишгоҳи Уэмбли (Лондон, Англия) мегузарад, охирин ҳунарнамоии ӯ бо либосҳои тими миллӣ хоҳад буд.

- Ман бо тими миллии Италия дар Уэмбли хайрухуш мекунам, дар ин майдон ман ғолиби Евро – 2020 шудам. Мехоҳам тими миллиро бо хотираҳои нек видоъ кунам, - гуфт Келлини.

 

 

 

ЛИГАИ ҚАҲРАМОНҲО

«Реал» дар сафар аз «Манчестер Сити» шикаст хӯрд

«Манчестер Сити» дар қувваозмоии аввали даври нимниҳоии Лигаи қаҳрамонҳо тими «Реал» (Мадрид)-ро дар майдонаш бо ҳисоби 4:3 мағлуб намуд. 

Бар пояи иттилои сомонаи мусобиқот, голҳоро аз дастаи ғолиб Кевин Де Брюне (дақ.2), Габриел Жесус (11), Фил Фоден (53) ва Бернарду Силва (74) заданд. Тӯбҳои тими шоҳонаро Карим Бензема (дақ. 33, 82) ва Винисиус Жуниор (55) ба самар расонданд. 

Бозии ҷавобии дастаҳо 5 май баргузор мегардад. 

Ёдовар мешавем, ки имрӯз ҷуфти дигари даври нимфинал «Вилярреал» ва «Ливерпул» бо ҳам неру месанҷанд. 

 

Маҳмуд БАҲРОМ, шореҳи варзиш