Дар робита ба Фармони Президенти Ҷумҳурии Тоҷикистон аз 16 марти соли 2022 «Дар бораи эълон намудани мораторий ба ҳама намуди санҷишҳои фаъолияти субъектҳои соҳибкорӣ» вакилони Маҷлиси намояндагон Қонуни Ҷумҳурии Тоҷикистон «Дар бораи мораторий ба санҷишҳои фаъолияти субъектҳои соҳибкорӣ»-ро қабул намуданд. 

 

Зимни баррасии лоиҳа Саъдӣ Қодирзода, раиси Кумитаи давлатии сармоягузорӣ ва идораи амволи давлатӣ, иброз дошт, ки ҳадаф аз қабули Қонун дастгирии давлатии фаъолияти субъектҳои соҳибкорӣ, фароҳам овардани фазои мусоид барои ҷалби сармоя ва ташкили ҷойҳои нави корӣ мебошад. 

- Муносибатҳои вобаста ба мораторийи эълоншуда дар доираи лоиҳаи Қонуни мазкур танзим шуда, он асосҳои ҳуқуқии татбиқи мораторий ба санҷишҳои фаъолияти субъектҳои соҳибкориро муайян карда, тартиби татбиқи мораторий ба санҷишҳоро муқаррар ва ҳуқуқу манфиатҳои қонунии шаҳрвандонро ҳифз менамояд. Тибқи муқаррароти лоиҳа, дар давраи татбиқи мораторий ба санҷишҳо ҳолатҳои таҳти санҷишу назорат қарор гирифтани фаъолияти субъектҳои соҳибкорӣ бо назардошти хавфҳои истисно аз татбиқи мораторий ба санҷишҳои фаъолияти субъектҳои соҳибкорӣ пешбинӣ шудааст, - гуфт раиси кумита.

Бар асоси лоиҳа, мақоми ваколатдори давлатӣ оид ба сармоягузорӣ ва идораи амволи давлатӣ масъул гардидааст, ки аз натиҷаи татбиқи мораторий ба санҷишҳо мониторинги татбиқи қонунро бо тартиби муқарраргардида гузаронда, аз натиҷаи он гузориши таҳлилӣ ба Ҳукумати кишвар манзур менамояд. 

Бояд гуфт, ки бо дастгириҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Ҳукумати кишвар вобаста ба фароҳам овардани фазои мусоид барои рушди соҳибкорӣ, сармоягузорӣ ва ба меъёрҳои байналмилалӣ мутобиқ намудани онҳо ислоҳоти бомаром идома дорад. Дар ин замина, ҷиҳати дастгирии  фаъолияти соҳибкорӣ ва бартараф намудани монеаҳои мавҷуда қаблан се маротиба (солҳои 2008 – 2010, 2011 – 2014 ва 2018 – 2020) ба санҷишҳои фаъолияти субъектҳои соҳибкории хурду миёна ва соҳаҳои истеҳсолӣ мораторий эълон гашта буд, ки натиҷаи он назаррас арзёбӣ мегардад. 

Бо назардошти таҷрибаи мазкур, ташаббуси навбатии Сарвари давлат доир ба эълон гардидани мораторий дар доираи ҷаласаи ХХII Шурои машваратии назди Президенти Ҷумҳурии Тоҷикистон оид ба беҳтар кардани фазои сармоягузорӣ (16 марти соли 2022) амри зарурӣ дониста шуд. Зеро дар шароити кунунии иқтисоди ҷаҳонӣ, афзоиши рақобатҳои тиҷоратӣ, болоравии нархи молу маҳсулот дар ҷаҳон, ҷорӣ гардидани маҳдудият дар масири интиқоли молу маҳсулот ва дигар омилҳои берунӣ ба иқтисодиёти Тоҷикистон иқдоми саривақтист.

 

Маҳмуд МИРЗОЁН, 

«Ҷумҳурият»