Lenta.ru. Владимир Путин, Президенти Россия, изҳор дошт, ки яке аз пояҳои асосии давлатдории Россия ватандӯстӣ мебошад. Сарвари давлат, инчунин, ватандӯстиро яке аз муҳимтарин арзишҳои ҷомеаи Россия номид. Вай таъкид кард, ки муҳаббат ба Ватан дар лаҳзаҳои ҳалкунанда нисбат ба кишвар зуҳур менамояд. Путин гуфт, ин ваҳдати мардум кафолат медиҳад, ки Россия ба мушкилтарин чолишҳо посухи муносиб диҳад.

Путин иброз дошт, ки ҷомеаи Россия  ягонагии худро беш аз пеш нишон медиҳад. Сарвари давлат ба нотавонии Ғарб барои аз дохил хароб кардани кишвар ишора кард.

Қаблан Дмитрий Медведев, муовини раиси Шурои амният, дар бораи ватандӯстӣ ҳарф зада буд. Ба гуфтаи ӯ, ватандӯстӣ на тарзи фикрронӣ, балки амал аст. 

 

 

Беларус то соли 2025 содироти озуқаро ба 8 миллиард доллар мерасонад

 

Мир24. Беларус ният дорад то соли 2025 содироти маводи ғизоиро ба 8 миллиард доллар расонад. Дар ин бора вазири кишоварзӣ ва озуқаи ҷумҳурӣ Игор Брило зимни Форуми VI байналмилалии “Гӯшти Беларус” изҳор намуд.

«Охири соли 2021 кишвари мо аз рӯи индекси глобалии амнияти озуқаворӣ дар байни 113 кишвари ҷаҳон дар ҷойи 36-ум қарор дошт. Бо вуҷуди ин, мо рушд ва пешрафтро идома медиҳем. Мо мехоҳем комплекси агросаноатии худро ба зинаи нави тараққиёт барорем, - иброз кард Брило. 

Ба гуфтаи ӯ, ҳукуматдорони кишвар ният доранд, ки дар панҷ соли оянда тавлидоти маҳсулоти кишоварзиро 14 дарсад афзоиш дода, то соли 2025-ум  9,2 миллион тонна шир ва 2,1 миллион тонна гӯшт истеҳсол намоянд. 

 

 

Изҳороти Президенти Озарбойҷон Илҳом Алиев

 

Синхуа. Президенти Озарбойҷон Илҳом Алиев дар мулоқот бо Иля Дарчиашвили, вазири корҳои хориҷии Гурҷистон, изҳор дошт, ки Озарбойҷон, Гурҷистон ва Арманистон, бахусус дар давраи баъд аз низоъ, имкони хуби ҳамкориҳои сеҷониба доранд. 

Ҷониби Озарбойҷон ба ин омода аст. Сарвари Озарбойҷон таъкид кард, Гурҷистон низ ба ин мавқеъ шарик аст ва изҳори умедворӣ намуд, ки Арманистон дарк хоҳад кард, ки ин ягона роҳи истиқрори субот ва амният дар минтақа аст. Ӯ афзуд, ки ҳар ду мамлакат дар бобати тараққиёти Қафқози Ҷанубӣ ақидаи умумӣ доранд.

Дарчиашвили аз дастгирии Илҳом Алиев дар рушди муносибатҳои Озарбойҷону Гурҷистон баҳои баланд дода, ба зарурати тавсеаи минбаъдаи ҳамкориҳои дуҷониба таъкид намуд.

Вазири корҳои хориҷии Гурҷистон ба Президенти Озарбойҷон даъватномаи Сарвазир Ираклий Гарибашвилиро ҷиҳати анҷом додани сафари расмӣ ба Гурҷистон расонд.

 

 

Дар Ӯзбекистон навхонадорон бояд озмоиши ДНК супоранд

 

CentralAsia (UZ) . Тибқи Фармони Президенти Ҷумҳурии Ӯзбекистон Шавкат Мирзиёев, аз 1 июли соли 2023 дар ин кишвар санҷиши молекулавӣ-генетикӣ (ДНК) барои шахсони ба ақди никоҳ воридшаванда  роҳандозӣ мегардад. 

Санҷиш аз ҳисоби зану шавҳар дар Маркази ҷумҳуриявии солимии репродуктивии аҳолӣ ва шуъбаҳои минтақавии он гузаронда мешавад. Дар ҷумҳурӣ никоҳҳои байни хешу табор сурат мегиранд, бинобар ин, ташхиси пешакии геномӣ муайян карда метавонад, ки оё зану шавҳар ба ҳам мувофиқанд ё не ва пайванди онҳо ба саломатии наслҳои оянда чӣ гуна таъсир мерасонад.

Президент дастур дод, ки то 1 июл лоиҳаи қонунеро, ки тартиби гузарондани санҷиши молекулавӣ-генетикии шахсони никоҳшаванда, инчунин, ташхиси лаборатории биоматериалӣ аз занони ҳомила барои ташхиси молекулавӣ-генетикӣ гирифташударо пешбинӣ мекунад, таҳия намоянд.