“Бунёди миллат аз маориф оғоз меёбад ва ғамхорӣ нисбат ба 

маориф – сармоягузорӣ барои рушди неруи инсонӣ ва ояндаи ободи давлат ва Ватан мебошад”.

 

Ин суханҳо аз ҷониби Президенти Ҷумҳурии Тоҷикистон муҳтарам Эмомалӣ Раҳмон зимни ироаи Паёми навбатӣ ба Маҷлиси Олии Ҷумҳурии Тоҷикистон баён гардид. Ҳамзамон, ҷиҳати рушди соҳаи маориф аз ҷониби Сарвари давлат ба масъулин як қатор  супоришҳо дода шуданд.

Бо ташаббуси Мақомоти иҷроияи ҳокимияти давлатии шаҳри Турсунзода ҷиҳати иҷрои дастури маорифпарваронаи Пешвои муаззами миллат ва истиқболи арзандаи Ҷашни 35 - солагии Истиқлоли давлатии Ҷумҳурии Тоҷикистон тадбирҳои зарурӣ амалӣ шуда истодаанд. Аз ҷониби раиси шаҳр Парвиз Акрамзода ва масъулони соҳа дар тамоми деҳоти дуру наздик доир ба бунёди биноҳои нави таълимӣ, беҳтар намудани шароити таълиму тарбия бо фаъолону соҳибкорон, кумитаи падару модарони муассисаҳои таълимӣ суҳбату мулоқотҳо баргузор ва корҳои фаҳмондадиҳӣ ҷараён гирифтанд.

Ин амали созанда самараи нек ба бор овард. Танҳо дар се моҳи соли ҷорӣ бо мақсади муҳайё намудани шароити таҳсил дар назди  24 муассиса сохтмони 24 бинои нави таълимӣ ба нақша гирифта шуд, ки  дорои 239 синфхонаи иловагӣ буда, барои 5640 ҷойи нишаст пешбинӣ гардидааст. Илова ба ин, ҷиҳати ба тарбия фаро гирифтани кӯдакон дар шаҳр сохтмони 3 муассисаи томактабӣ барои 460 нафар кӯдак ба нақша гирифта шудааст.

Айни ҳол корҳои сохтмонӣ дар тамоми муассисаҳо муташаккилона идома дошта,  иншооти мазкур  дар доираи амалисозии тадбирҳои созанда ба истиқболи Ҷашни 35 - солагии Истиқлоли давлатӣ  мавриди баҳрабардорӣ қарор дода мешаванд.

 

Матлубаи АБДУҚАҲҲОР, “Ҷумҳурият”