Сафири фавқулода ва мухтори Ҷумҳурии Тоҷикистон дар Ҷумҳурии Ӯзбекистон Абдуҷаббор Раҳмонзода дар арафаи Иди саиди Фитр барои боздид ва мулоқот бо маҳбусони тоҷикистонӣ аз маҳали иҷрои ҷазои рақами 42-и марбути Сарраёсати иҷрои ҷазои назди Вазорати корҳои дохилии Ҷумҳурии Ӯзбекистон дидан кард. 

- Бо мусоидати маъмурияти Сарраёсати иҷрои ҷазои назди ВКД Ӯзбекистон, воқеъ дар вилояти Тошканд, шароит фароҳам омад, ки бо як гурӯҳ маҳбусон дидору мулоқот анҷом диҳам. Маълум шуд, ки мутасаддиён ва кормандони он нисбат ба маҳбусон муносибати хуб мекунанд. Аз номи сафорат онҳоро бо Иди саиди Фитр табрик намуда, барояшон саломатӣ ва сабру бурдборӣ таманно намудем, - гуфт ба “Ҷумҳурият” Абдуҷаббор Раҳмонзода ва илова кард, ки фароҳам омадани шароити боздид аз маҳали маҳбусон маҳз натиҷаи тавсеаи ҳамкориҳои созандаи миёни Ҷумҳурии Тоҷикистон ва Ҷумҳурии Ӯзбекистон ва иқдоми босамари президентҳои ду кишвар муҳтарам Эмомалӣ Раҳмон ва муҳтарам Шавкат Мирзиёев мебошад.

- Зимни мулоқот таъкид доштам, ки шаҳрвандони ҷумҳуриамон дар ҳар гуна вазъият бояд қонуну қоидаҳои кишвари мавриди иқоматашонро эҳтиром ва риоя намоянд ва минбаъд дар Тоҷикистон ва кишварҳои дигар ҳаргиз ба корҳои хилофи қонун даст назананд,- иброз дошт сафир. 

Маҳбусони тоҷик аз Ҳукумати Тоҷикистон барои таваҷҷуҳ ва аёдати онҳо, инчунин, муносибати неку хайрхоҳона ва шароити хуб ба роҳбарияти маҳали иҷрои ҷазо миннатдорӣ баён карданд.

Сафорат ба манзури рафъи баъзе эҳтиёҷоти маҳбусони тоҷик ба сифати кумакҳои башардӯстона ба маҳали иҷрои ҷазои мазкур орд, равған, биринҷ, картошка, сабзӣ, шарбатҳои ташнашикан, шакар, ширинӣ ва дигар мавод интиқол дод. 

Қарор аст, ки маъмурияти маҳали иҷрои ҷазо аз ин ҳисоб барои маҳбусони тоҷикистонӣ чанд маротиба суфраи пурнозу неъмат фароҳам меорад. 

 

Мирасрор АҲРОРОВ,

барои “Ҷумҳурият”, 

шаҳри Тошканд