ТАСС. Президентҳои  Россия ва Беларус Владимир Путин ва Александр Лукашенко  дар  суҳбати телефонӣ ҷанбаҳои мухталифи ҳамкориҳо, аз ҷумла дар робита ба омодагӣ ба мулоқоти дарпешистодаи роҳбарони кишварҳои узви Созмони Аҳдномаи амнияти дастаҷамъӣ (СААД)-ро баррасӣ карданд. Дар ин бора дафтари матбуоти Кремл хабар дод.  

Дар Москва барои баргузории саммити ҷашнии СААД, ки моҳи май баргузор мешавад, омодагӣ мегиранд. Қаблан котиби матбуоти Роҳбари Россия Дмитрий Песков хабар дода буд, ки санаи баргузории ин нишаст, аллакай, муайян гардидааст, вале дертар эълон хоҳад шуд. Ба гуфтаи ӯ, дар нишасти роҳбарони кишварҳои узви СААД шояд ба вазъи Украина низ дахл карда шавад.

 

 

 

Гармии бесобиқа дар Ҳиндустон ва Покистон  

Мир24. Ҳарорати миёнаи ҳадди аксар дар қисмати шимолу ғарб ва марказии Ҳиндустон дар моҳи апрел баландтарин дар 122 соли охир буда, 37 дараҷаро ташкил додааст. Дар Покистони ҳамсоя ҳафтаи гузашта ҳарорати ҳаво то 47 дараҷа боло рафт. Ин баландтарин нишондоди тамоми солҳо дар нимкураи шимолӣ дар чунин рӯз мебошад.

Бар асари гармо ва хушксолии бесобиқа, бемористонҳо дар Ҳиндустон ва Покистон аз ҳад зиёд пур гардидаанд, мушкили таъмини неруи барқ вуҷуд дорад ва аз сокинони маҳаллӣ дархост шудааст, то ҳадди имкон дар хона бимонанд.

 

 

 

Суҳбати телефонии Путин ва Макрон  

Мир24. Дафтари матбуоти Кремл хабар дод, ки гуфтугӯи телефонии президентҳои Россия ва Фаронса Владимир Путин ва Эммануэл Макрон беш аз ду соат идома ёфт. Онҳо дар мавриди вазъи Украина гуфтугӯ карданд. Путин бори дигар таъкид намуд, ки Москва бо вуҷуди омода набудани ҳукуматдорони Украина ба кори ҷиддӣ барои муколама бо Киев омода аст. 

Дар навбати худ, Макрон аз амнияти озуқавории ҷаҳонӣ изҳори нигаронӣ кард. Ба он чунин посух гирифт, ки вазъият, пеш аз ҳама, ба далели таҳримҳои Ғарб печида шудааст.

Ин нахустин гуфтугӯи роҳбарони Россия ва Фаронса пас аз интихоби дубораи Макрон ба мансаби президентӣ мебошад. Дар ҷараёни суҳбат Владимир Путин ӯро бо пирӯзӣ дар интихобот табрик гуфт.

 

 

 

Вучич: «Сербия ба сиёсати таҳримот бовар надорад ва манфиатҳои худро ҳифз кардан мехоҳад» 

Аргументы и факты. Президенти Сербия Александр Вучич гуфт, ки Белград ба сиёсати таҳримот бовар надорад, аммо ҳадафи стратегии он пайвастан ба Иттиҳоди Аврупо мебошад.

«Оид ба таҳримҳо: мо даҳсолаҳо қурбонии он будем ва ба сиёсати таҳримҳо бовар намекунем. Мо манфиатҳои худро дорем ва узви Иттиҳоди Аврупо нестем.  Агар Сербия ба таҳримҳо ҳамроҳ шавад ё на, касе дар Россия мутаассир нахоҳад шуд. Аз сӯи дигар, мо дар робита ба Косово ва дигар масъалаҳое, ки Россия аз мавқеи мо пуштибонӣ менамояд, манфиатҳои миллии худро дорем”, - гуфт Вучич.  Сиёсатмадор зикр кард, ки 76 дарсади сербҳо мухолифи таҳримҳои зидди Россия ҳастанд.

Қаблан Вучич гуфта буд, ки кишвар талош хоҳад кард, то равобити шарикӣ ва дӯстона бо Россияро нигоҳ дорад. Роҳбари Сербия ёдовар шуд, ки Белград дар робита ба иттифоқҳои низомӣ бетараф аст ва ният дорад ин сиёсатро идома диҳад.