4 май суҳбати телефонии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Ҷумҳурии Ӯзбекистон муҳтарам Шавкат Мирзиёев доир гардид.

Дар оғози суҳбат роҳбарони ду давлат ба муносибати Иди саиди Фитр бо таманниёти сулҳу некуаҳволӣ ва шукуфоӣ ба мардумони Тоҷикистон ва Ӯзбекистон мубодилаи табрикоти самимӣ намуданд.

Муҳтарам Эмомалӣ Раҳмон ва муҳтарам Шавкат Мирзиёев ҳолати кунунӣ ва дурнамои муносибатҳои ҳусни ҳамҷаворӣ, дӯстӣ ва шарикии стратегии Тоҷикистону Ӯзбекистонро дар арсаҳои мухталифи ҳамкорӣ, аз ҷумла тиҷоративу иқтисодӣ, гуманитариву фарҳангӣ ва дигар соҳаҳои мавриди таваҷҷуҳи тарафайн баррасӣ карданд. Бо изҳори қаноатмандӣ ҷараёни рушди ҳамаҷонибаи онҳо таъкид гардида, ҷиҳати боз ҳам ғанӣ гардондани ҳамкориҳои дуҷониба бо муҳтавои нави амалӣ мутобиқ ба мувофиқаҳои қаблан дар сатҳи олӣ ҳосилшуда изҳори итминон карда шуд.

Дар зимн, Президенти Ҷумҳурии Ӯзбекистон аз Сарвари давлати мо ҷиҳати анҷом додани сафари расмӣ ба кишвари ҳамсоя дар фурсати муносиб даъват ба амал овард. Замони мушаххаси ин сафар бо роҳҳои дипломатӣ ҳамоҳанг карда мешавад.

Дар идомаи суҳбат роҳбарони Тоҷикистон ва Ӯзбекистон, ҳамчунин, масъалаҳои алоҳидаи мубрами дорои аҳамияти байналмилалӣ ва минтақавӣ, минҷумла вазъи амниятӣ дар Осиёи Марказиро мавриди муҳокима қарор доданд.

Суҳбат дар фазои барои муносибатҳои Тоҷикистон ва Ӯзбекистон ба таври анъанавӣ хоси ҳамдигарфаҳмӣ, эҳтиром ва эътимоди мутақобила доир гардид.