Соли 2010 тариқи Квотаи президентӣ ба Донишгоҳи давлатии омӯзгории Тоҷикистон ба номи Садриддин Айнӣ дохил шуда, онро соли 2015 бо ихтисоси муаллими забон ва адабиёти тоҷик хатм намудам.  Ба ҳайси омӯзгори фанни забон ва адабиёти тоҷик дар муассисаҳои таҳсилоти миёнаи умумии шаҳри Душанбе фаъолият намудам. Соли 2021 ба ҳайси муовини директори Муассисаи таҳсилоти миёнаи умумии № 91-и ноҳияи Сино таъин гардидам. 13-уми октябри соли 2021 бошад, бо фармони раиси ноҳияи Сино директори Муассисаи таҳсилоти миёнаи умумии № 111 (маҳаллаи Чортути Боло) таъин гардидам. 

 

Зимни фаъолият дар муассиса дар баробари таълиму тарбияи насли наврас ба корҳои бунёдкорию ободонӣ машғул мегардидем. Дар ҳамдастӣ бо омӯзгорон деворҳои мактабро рангубор кардем. Бахшида ба Ҷашни 30-солагии Истиқлоли давлатии Ҷумҳурии Тоҷикистон ва Рӯзи Парчами давлатӣ дар саҳни муассиса пояи Парчами давлатиро бо баландии 10 метр насб намудем. Дар баробари ин, бо ҷалби сокинон ва соҳибкорони маҳаллӣ боми бинои нави муассисаро пӯшондем. 

Кор хуб ҷараён дошт, то он вақте ки Мирсаид Негматов, падари яке аз хонандагони муассиса, ба мактаб омада, маро таҳқир намуд. Ҳол он ки писараш Эҳсон Негматов ба дарсҳо намеомад, инро журналҳои синфӣ тасдиқ мекунанд ва одобу ахлоқи хуб надошт. Инчунин, бо мӯйи дароз ба мактаб меомад ва ман ҳамчун директори муассиса барои ислоҳи вазъ чора андешидам, ки боиси «хашм»-и падараш шуд. Падар ба ҷои иҷрои уҳдадориҳои худ, ки Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» муқаррар намудааст, Умаров Алишер, корманди Раёсати мубориза бар зидди ҷиноятҳои муташаккили Вазорати корҳои дохилиро ба мактаб даъват намуд. Ҳамчунин, мудири маорифи ноҳияи Сино Муқаддас Носирзода, сардори шуъбаи кадрҳои Сарраёсати маорифи шаҳри Душанбе Ҷумъахон Самиев ва дигар масъулонро ба Муассисаи таҳсилоти миёнаи умумии № 111 овард. Мудири маориф ва сардори шуъбаи кадрҳои сарраёсат маро маҷбур карданд, ки аризаи аз кор рафтанамро нависам. Зери фишор аризаи аз кор рафтанамро навиштам. Ҳамин тавр, аз санаи 14 апрел инҷониб бекорам. 

Аз ин хотир, аз минбари Нашрияи расмии Ҷумҳурии Тоҷикистон– рӯзномаи «Ҷумҳурият» муроҷиат менамоям, ки ин ҳодисаро одилона мавриди санҷиш қарор диҳанд, то ҳақиқати воқеӣ рӯи об барояду ман аз нав ба ҷои кор таъмин гардам.

 

Ф. ИБРОҲИМОВА, 

собиқ директори  Муассисаи  таҳсилоти миёнаи умумии 

№ 111 – и ноҳияи Синои шаҳри Душанбе