Дар Фестивали байналмилалии фолклории “Баҳори Бойсун”, ки рӯзҳои 7-8 май баргузор гардид, гурӯҳи “Бибиҳо”-и вилояти Суғди Тоҷикистон сазовори ҷои дуюм шуд. Ба ин гурӯҳ Ҳунарпешаи халқии Тоҷикистон Сайрам Исоева роҳбарӣ мекунад.

 

Дар ин фестивал 150 нафар ба  намояндагӣ аз дастаҳои фолклории 30 давлат ширкат карданд. Он дар доманаи талу теппаҳои деҳаи Паданги ноҳияи Бойсун, зери осмони кушод ба вуқуъ пайваст, ки тамошобинони зиёдро гирди ҳам овард.

 Ин чорабинии фарҳангӣ бори нахуст соли 2002 ҳамчун фестивали кушоди фолклорӣ  роҳандозӣ гардида, дар он танҳо дастаҳои фолклории соири шаҳру вилоятҳои  Ҷумҳурии Ӯзбекистон мушорикат доштанд. Соли 2004 бори дувум ин фестивал дар ҳамон шакл баргузор ва баъд дар байн танаффуси калон шудааст. 

 “Баҳори Бойсун” соли 2017 аз нав барқарор гардида, соли 2022 мақоми байналмилалиро касб намуд. Он таҳти ҳимояти молии Созмони байналмилалии ЮНЕСКО роҳандозӣ гардид.

 Ҷои аввалро мизбонон - аъзои дастаи фолклории “Бойсун”-и вилояти Сурхондарё соҳиб шуданд. 

 Инчунин, дар ин Фестивал дастаи “Ҷӯраҳо”-и вилояти Хоразм, “Оқ масҷид”-и Ҷумҳурии Қароқалпоқистон, “Ибрат”-и Ҷумҳурии Қирғизистон ва “Навоӣ”-и вилояти Навоӣ сазовори ҷойҳои ифтихорӣ гардиданд.

- Иштироки мо дар Фестивали байналмилалии фолклории “Баҳори Бойсун”  бори нахуст сурат гирифт ва хеле бобарор анҷом ёфт. Дастаи “Бибиҳо”-и мо аз ҳунарпешаҳо Неъматҷон Дӯстматов ва Малоҳат Абдушукурова, Шаҳодат Ҷӯраева, Малика Эргашева, Офият Масаидова, Тоҷинисо Ниёзова, Мирзоумар Аҳмадов, Шероз Каримов иборат аст. Ин ҷо аз ҳаёту рӯзгори мардуми тоҷик, хусусан занону духтарони он,  лаҳзаеро манзури аъзои доварон кардем. Ин баромади мо хеле муваффақият пайдо кард ва аз тарафи доварону тамошобинон истиқболи гарм ёфт,-гуфт ба хабарнигори “Ҷумҳурият” Сайрам Исоева.

 Дар доираи Фестивали мазкур бозиву мусобиқаҳои миллӣ низ, роҳандозӣ гардиданд.

 

Мирасрор АҲРОРОВ, “Ҷумҳурият”,

Тошкент-Бойсун-Тошкент