Дар доираи сафари расмии Раиси Сенати Парламенти Ҷумҳурии Қазоқистон Маулен Ашимбаев дар Ҷумҳурии Тоҷикистон, музокироти васеи ҳайатҳои Маҷлиси миллии Маҷлиси Олии Ҷумҳурии Тоҷикистон ва Сенати Парламенти Ҷумҳурии Қазоқистон доир гашт, ки зимни он маҷмуи масъалаҳои ҳамкориҳои шарикӣ ва робитаҳои байнипарламентии ду кишвари дӯст баррасӣ гардиданд.

Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ таваҷҷуҳи ҳамтои худро ба тавсеаи ҳамкориҳо дар бахшҳои сармоягузорӣ, амалигардонии лоиҳаҳо дар минтақаҳои озоди иқтисодии Тоҷикистон ва мусоидат ба таъмини иҷрои саривақтии қарорҳои Комиссияи байниҳукуматӣ оид ба ҳамкории тиҷоративу иқтисодӣ ҷалб намуд.

Дар робита ба мавзуи таъмини амнияти минтақавӣ, бахусус вазъи мураккаби Афғонистон, идомаи ҳамкории босамари кишварҳо дар бахши ҳарбию техникӣ зарур шумурда шуд.

 

 

 

Ҳайати Маҷлиси намояндагон ба Озарбойҷон сафар намуд

Субҳи имрӯз ҳайати вакилони Маҷлиси намояндагон таҳти раёсати Раиси Маҷлиси намояндагони Маҷлиси Олӣ Маҳмадтоир Зокирзода ба шаҳри Бокуи Ҷумҳурии Озарбойҷон сафар кард, - иттилоъ дод котиби матбуоти Маҷлиси намояндагон Муҳаммадато Султонов.

Маҳмадтоир Зокирзода ва ҳайати ҳамроҳони ӯ  17-18 май  дар конфронси 3-юми генералии Ассамблеяи Парлумонии Созмони ҳамкории иқтисодӣ, ки дар шаҳри Боку мегузарад, иштирок менамоянд.

 

 

Вохӯрии вазирони корҳои хориҷии кишварҳои Осиёи Марказӣ

Дар шаҳри Душанбе таҳти раёсати вазири корҳои хориҷии Ҷумҳурии Тоҷикистон Сироҷиддин Муҳриддин ҷаласаи навбатии роҳбарони мақомоти корҳои хориҷии кишварҳои Осиёи Марказӣ баргузор шуд.

Ба иттилои вазорат, дар мулоқот таъкид гардид, ки нигоҳ доштани муколамаи эътимодбахши сиёсӣ ва густариши минбаъдаи муносибатҳо байни давлатҳои Осиёи Марказӣ мақсади асосӣ мебошад.

Роҳбарони мақомоти корҳои хориҷӣ масъалаҳои ҳамкориҳои бисёрҷонибаро дар бахшҳои сиёсӣ, тиҷоратию иқтисодӣ, фарҳангӣ, гуманитарӣ ва ғайра баррасӣ карда, перомуни мавзуъҳои мубрами рӯзномаи минтақавӣ ва байналмилалӣ табодули афкор намуданд.

 

 

Масъалаҳои таъини ҳудуд ва аломатгузории сарҳади давлатии Тоҷикистону Қирғизистон баррасӣ гаштанд

Дар доираи ҷаласаи Шурои вазирони корҳои хориҷии Иттиҳоди Давлатҳои Мустақил дар шаҳри Душанбе вазири корҳои хориҷии Ҷумҳурии Тоҷикистон Сироҷиддин Муҳриддин бо вазири корҳои хориҷии Ҷумҳурии Қирғизистон Ҷээнбек Кулубоев мулоқот кард. Дар ин бора Вазорати корҳои хориҷии кишвар хабар дод.

Онҳо пойдории усулҳои дӯстӣ ва ҳусни ҳамҷавориро, ки асоси ҳамзистии осоиштаи мардумони тоҷику қирғиз мебошанд, зикр намуданд. Гузашта аз ин, масъалаҳои марбут ба таъини ҳудуд ва аломатгузории сарҳади давлатии Тоҷикистону Қирғизистон ба таври муфассал баррасӣ шуданд. Дар ин замина аҳамияти идома додани музокироти пай дар пай ва ҷустуҷӯи роҳҳои ҳалли он мувофиқ ба манфиатҳои тарафайн таъкид гардид.

Инчунин, тавофуқ карданд, ки ҷиҳати фароҳам овардани шароити мусоид барои истифодаи иқтидори истифоданашуда дар соҳаи тиҷорату иқтисод чораҳои зарурӣ меандешанд.

 

 

Шараф Шерализода соҳибкорони Мисрро ба ҳузур пазируфт

Муовини вазири корҳои хориҷии Ҷумҳурии Тоҷикистон Шараф Шерализода ҳайати соҳибкорони Ҷумҳурии Арабии Мисрро, ки бо мақсади шиносоӣ бо имкониятҳои сармоягузории кишвар, дарёфти шарикон ва роҳандозии фаъолияти муштарак ба Тоҷикистон омадаанд, ба ҳузур пазируфт.

Ҷонибҳо оид бо густариши равобити тиҷоратӣ, сармоягузорӣ ва имконияти ба роҳ мондани ҳамкориҳои мустақим миёни бахши хусусии ду кишвар бо назардошти зарфиятҳои фаровони мутақобил табодули афкор намуданд.