16 май Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Москваи Федератсияи Россия дар мулоқоти сарварони давлатҳои аъзои Созмони Аҳдномаи амнияти дастаҷамъӣ (СААД) иштирок ва суханронӣ карданд.

 

Дар мулоқоти сарварони давлатҳои аъзои Созмон Президенти Ҷумҳурии Тоҷикистон муҳтарам Эмомалӣ Раҳмон, Сарвазири Ҷумҳурии Арманистон Никол Пашинян, Президенти Ҷумҳурии Беларус Александр Лукашенко, Президенти Ҷумҳурии Қазоқистон Қосим-Жомарт Токаев, Президенти Ҷумҳурии Қирғизистон Садир Жапаров, Президенти Федератсияи Россия Владимир Путин ва Дабири кулли Созмони Аҳдномаи амнияти дастаҷамъӣ Станислав Зас иштирок намуданд.

Ин нишаст ба 30-юмин солгарди имзои Созишнома дар бораи Созмони Аҳдномаи амнияти дастаҷамъӣ ва 20-умин солгарди таъсиси Созмони Аҳдномаи амнияти дастаҷамъӣ бахшида шуд.

Мулоқотро бо сухани муқаддимавӣ Президенти Федератсияи Россия Владимир Путин ифтитоҳ карда, сарварони давлатҳои аъзои Созмони Аҳдномаи амнияти дастаҷамъиро хайрамақдам гуфт.

Кори ҷаласа таҳти раёсати Сарвазири Ҷумҳурии Арманистон, Раиси Шурои амнияти дастаҷамъии Созмони Аҳдномаи амнияти дастаҷамъӣ Никол Пашинян бо иштироки сарварони давлатҳои аъзои Созмон дар ҳайати маҳдуд оғоз гардида, бо имзои санадҳо ва нишасти матбуотӣ хотима ёфт.

Аъзои Шурои амнияти дастаҷамъии СААД татбиқи тамоми қарордодҳои Созмон дар 20 соли мавҷудияти он, инчунин, вазъ дар ҳудуди кишварҳои аъзои Созмон ва дурнамои рушди онро баррасӣ карданд.

Аз рӯи натиҷаи мулоқот Изҳороти Шурои амнияти дастаҷамъии Созмон ба муносибати 30-юмин солгарди имзои Созишнома дар бораи Созмони Аҳдномаи амнияти дастаҷамъӣ ва 20-солагии таъсиси СААД ва қарори Шурои амнияти дастаҷамъии Созмон “Дар бораи супоридани мукофотҳои Созмони Аҳдномаи амнияти дастаҷамъӣ ба иштирокчиёни амалиёти посдори сулҳи Созмони Аҳдномаи амнияти дастаҷамъӣ дар қаламрави Ҷумҳурии Қазоқистон” қабул карда шуд.