Дар асоси қарори Раиси Маҷлиси миллии Маҷлиси Олии Ҷумҳурии Тоҷикистон  Рустами Эмомалӣ 30 майи соли равон, соати 10:00 дар шаҳри Душанбе иҷлосияи даҳуми Маҷлиси миллии Маҷлиси Олии Ҷумҳурии Тоҷикистон, даъвати шашум баргузор мегардад. Дар ин бора аз Маҷлиси миллии Маҷлиси Олӣ иттилоъ доданд. 

 

Дар иҷлосияи навбатӣ баррасии Қонуни конститутсионии Ҷумҳурии Тоҷикистон «Оид ба ворид намудани иловаҳо ба Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ», Қонуни конститутсионии Ҷумҳурии Тоҷикистон «Оид ба ворид намудани тағйирот ба Қонуни конститутсионии Ҷумҳурии Тоҷикистон «Дар бораи вазъи ҳуқуқии узви  Маҷлиси миллӣ ва вакили Маҷлиси намояндагони Маҷлиси Олии Ҷумҳурии Тоҷикистон», қонунҳои Ҷумҳурии Тоҷикистон «Дар бораи мораторий ба санҷишҳои фаъолияти субъектҳои соҳибкорӣ» ва  «Дар бораи истеҳсолоти иҷро», Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд», Қонуни Ҷумҳурии Тоҷикистон «Оид ба ворид намудани тағйир ба Қонуни Ҷумҳурии Тоҷикистон «Дар бораи ҳифзи муҳити зист» ва дигар қонунҳои қабулнамудаи Маҷлиси намояндагон, инчунин, пешниҳоди Ҳукумати Ҷумҳурии Тоҷикистон дар бораи тартиби ҳалли масъалаҳои сохти маъмуриву ҳудудии Ҷумҳурии Тоҷикистон  дар назар дошта шудаанд.

 

 

 

 

Ҳайати Тоҷикистон барои расондани таъзия ба АМА сафар кард

Бо дастури Роҳбари давлат ҳайати Тоҷикистон таҳти роҳбарии вазири рушди иқтисод ва савдо Завқӣ Завқизода, раиси Кумитаи дин, танзими анъана ва ҷашну маросим Сулаймон Давлатзода, раиси Маркази исломӣ ва раиси Шурои уламо Саидмукаррам Абдулқодирзода ва сафири Тоҷикистон дар Амороти Муттаҳидаи Араб Шарифӣ Баҳодур дар шаҳри Абу-Дабӣ бо Президенти тозаинтихоби Амороти Муттаҳидаи Араб Шайх Муҳаммад ибни Зоид оли Наҳён мулоқот намуда, аз номи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар робита ба даргузашти собиқ Президенти Амороти Муттаҳидаи Араб аълоҳазрат Шайх Халифа ибни Зоид оли Наҳён таъзия ва тасаллият расонд.

Ба иттилои Вазорати рушди иқтисод ва савдо, Президенти тозаинтихоби Амороти Муттаҳидаи Араб миннатдории худро ба Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон баён намуд.

 

 

 

 

БАДАХШОН.  ҲАМЛАИ МУСАЛЛАҲОНА БА БИНОИ СУДИ ВИЛОЯТ

Маркази матбуоти Вазорати корҳои дохилии Ҷумҳурии Тоҷикистон хабар медиҳад, ки 16 майи соли ҷорӣ, соати 18:30  саркардаи гурӯҳи муташаккили ҷиноятии шаҳри Хоруғ Мамадбоқир Мамадбоқиров таҳти роҳбарӣ ва сарпарастии Улфатхоним Мамадшоева ва шахси дар ҷустуҷӯ қарордошта Алим Шерзамонов дар маҳаллаи Хоруғи Болои шаҳри Хоруғ бо мақсади халалдор намудани амнияти ҷамъиятӣ, монеъ шудан ба фаъолияти мақомоти давлатӣ, тарсондани аҳолӣ ва таъсиррасонӣ ба мақомоти ҳокимияти давлатӣ барои қабули қарор ба манфиати ашхоси ҷиноятпеша гирдиҳамоии ғайриқонунӣ ташкил намуданд. 

 

Дар изҳороти Вазорат омадааст, ки соати 20:40-и ҳамон рӯз бо супориши Мамадбоқир Мамадбоқиров як гурӯҳ ҷавонони ноогоҳ бо роҳбарии сокини 29-солаи маҳаллаи Ш. Шоҳтемури шаҳри Хоруғ Замир Назришоев ба хизматчиёни раёсати ВКД дар ВМКБ, ки дар бинои суди вилоят вазифаҳои хизматии худро иҷро мекарданд, ҳамлаи мусаллаҳона намуда, норинҷаки дастиро тарконданд.

Дар натиҷаи амалҳои ғайриқонунии номбурдагон муовини аввали сардори раёсати ВКД дар ВМКБ, полковники милитсия Ғайратшо Муборакшозода, корманди шуъбаи фаврии РҚД ВКД, капитан Шуҳрат Қамишев ва командири взводи таъиноти махсуси қисми ҳарбии «Н»-и қӯшунҳои дохилии ВКД, лейтенанти калон Абубакр Файзуллозода ҷароҳат бардошта, дар бемористон бистарӣ шуданд. 

Ҳангоми пешгирии ҳамлаи мусаллаҳона З. Назришоев захмӣ гардида, дар бемористон ба ҳалокат расид.

Дар ҷараёни амалиёт маводи махсуси зиддигирдиҳамоӣ истифода шуд. Барои муайян кардани дигар аъзои гурӯҳҳои муташаккили ҷиноятӣ, ки дар ҳамлаи мусаллаҳона иштирок карданд, чорабиниҳои фаврӣ - ҷустуҷӯӣ идома доранд.

Нисбат ба саркардагони ин ҳодиса аз тарафи прокуратураи ВМКБ парвандаи ҷиноятӣ оғоз шуд.