CentralAsia (KZ).  Бино ба иттилои хадамоти матбуоти Кремл, Президенти Россия Владимир Путин бо ҳамтои қазоқаш Қосим-Жомарт Токаев гуфтугӯи телефонӣ анҷом дод. Зимни суҳбат масъалаҳои мубрами рӯзномаи дуҷониба, аз ҷумла як қатор масъалаҳои амалии ҳамкориҳои тиҷоратию иқтисодӣ, баррасӣ шуданд.   

Сарварони ду кишвар, ҳамчунин, ба бархе аз ҷанбаҳои фаъолияти иттиҳодияҳои ҳамгироӣ дар фазои Авруосиё дахл карданд. Тамоюли тарафайн ба таҳкими ҳамаҷонибаи муносибатҳои иттифоқӣ ва шарикии стратегии Россия ва Қазоқистон тасдиқ гардид.

 

 

 

Паёми видеоии Си Ҷинпин ба ширкаткунандагони нишасти вазирони корҳои хориҷии БРИКС 

 

Синхуа. Раиси Ҷумҳурии Мардумии Чин Си Ҷинпин 19 май ба ҷаласаи вазирони корҳои хориҷии кишварҳои узви БРИКС паёми видеоӣ  ироа кард.

Си Ҷинпин зикр намуд, ки дар шароити таҳаввулоти бузург дар ҷаҳон ва пандемияи COVID-19, ки  дар садсола бесобиқа аст, омилҳои бесуботӣ, номуайянӣ ва ноамнӣ дар миқёси ҷаҳон афзоиш меёбанд. Бо вуҷуди ин, сулҳу рушд мавзуи асосии давру замон боқӣ мемонанд, саъю кӯшиши инсоният ба ҳаёти зебо коста намешавад. Рисолати таърихии ҷомеаи ҷаҳонӣ нигоҳ доштани ҳамбастагӣ ва ҳамкории мутақобилан судманд ба шумор меравад.

Кишварҳои БРИКС ҳамчун иштирокчии фаъол ва созандаи корҳои байналмилалӣ бояд бо иродаи устувор ва ҷасорати муассир ба сулҳу рушд мусоидат кунанд, адолату баробарӣ ва демократияву  озодиро ҳифз намоянд ва, ба ин васила, субот ва неруи мусбатро ба равобити ноороми байналмилалӣ ворид созанд. Си Ҷинпин таъкид кард, ки таърих ва воқеият ба мо гувоҳӣ медиҳанд, ки талош барои таъмини амнияти худ аз ҳисоби амнияти кишварҳои дигар танҳо боиси даргириҳо ва хатарҳои нав мешаванд. Ташаббуси глобалии амният, ки ман ба миён гузоштам, маҳз барои ноил гаштан ба амнияти тақсимнашаванда дар тамоми ҷаҳон тарҳрезӣ шудааст.

 

 

 

 

Нишасти иқтисодии Россия ва кишварҳои исломӣ оғоз шуд

 

Мир24. Дар Тотористон саммити иқтисодии Россия ва кишварҳои ҷаҳони ислом ба кор шуруъ кард. Меҳмононро бо беҳтарин анъанаҳои миллӣ пешвоз гирифтанд.

Яке аз меҳмонони нахустини ҳамоиши байналмилалӣ раиси Палатаи болоии Парлумони Туркманистон Гурбонгули Бердимуҳамедов буд. Ӯро дар фурудгоҳ бо нону намак ва гулдастаҳо пешвоз гирифтанд. Барои истиқболи Бердимуҳамедов, Раҳбари Тотористон Рустам Миннихонов шахсан омад.  

Қазон, аллакай, мизбони нишасти 13-уми байналмилалии иқтисодии "Россия - Ҷаҳони ислом" аст. Дар он намояндагони беш аз 50 минтақаи Россия ва 63 кишвари ҷаҳон ширкат доранд.  

 

 

 

Лукашенко бо губернатори вилояти Нижний Новгород вохӯрд

 

Мир24. Беларус ҳамкориҳоро бо минтақаҳои Россия густариш медиҳад ва бо ин мақсад, Александр Лукашенко дар Минск бо губернатори вилояти Нижний Новгород Глеб Никитин мулоқот кард. 

Беларус ба вилояти Россия маҳсулоти озуқаворӣ, қисмҳои эҳтиётии мошину тракторҳо, мошинҳои хоҷагии қишлоқ мефиристад. Александр Лукашенко пешниҳод намуд, ки корхонаҳои муштарак  тавсеа ёбанд.  "Ман дар бораи он фикр мекунам, ки Ғарб бо ҷорӣ намудани таҳримҳояш моро ба рушди фаъолтари Россия ва Беларус таҳрик дод. Агар касе тайёр бошад, ки дар ин бобат ба мо ҳамроҳ шавад, манфиати муҳим хоҳад гирифт",- гуфт Президенти Ҷумҳурии Беларус Александр Лукашенко.