Омодагиҳо ба Ҷашни 35 - солагии Истиқлоли давлатии Ҷумҳурии Тоҷикистон дар шаҳри Кӯлоб бо маром идома дошта, айни замон таъмиру бунёди 350 иншооти таъиноташон гуногун нақшабандӣ гардидааст. Аз ҷумла, дар деҳоти Кӯлоб 23,  деҳоти Даҳана 44,  деҳоти Зарбдор 48, деҳоти Зиракӣ 98 ва дар маркази шаҳр 137 иншоот то ҷашни мазкур ба истифода дода мешавад.

Тибқи иттилои Қурбон Аҳмадзода, мудири шуъбаи меъморӣ ва шаҳрсозии Мақомоти иҷроияи маҳаллии ҳокимияти давлатии шаҳр, аз рӯи нақшаи чорабиниҳои пешбинишуда ба ифтихори 35 - солагии Истиқлоли давлатӣ бунёду навсозии 500 иншоот дар назар аст. Феълан дар 105 иншоот сохтмон бо вусъат идома дорад. 

Ба гуфтаи манбаъ, дар арафаи Ҷашни байналмилалии Наврӯз дар шаҳр 6 иншоот, аз ҷумла мағозаи фурӯши масолеҳи сохтмонӣ ва сехи истеҳсоли сементблок, воқеъ дар Ҷамоати деҳоти Зиракӣ, деҳаи Бахтобод аз ҷониби соҳибкори маҳаллӣ Қаландаров Аломуддин, майдончаи варзиш дар деҳаи Маҳмадалӣ Ғаффор аз ҷониби соҳибкор Ҳофизи Бобоназар, бунгоҳи тиббӣ дар деҳаи Лавова, майдончаи варзиш дар Олтоули Ҷамоати деҳоти Даҳана аз ҷониби соҳибкор Матлуб Давлатов, мағозаи хӯрокворӣ дар деҳаи Офтоблиқои Ҷамоати деҳоти Зиракӣ аз ҷониби соҳибкор Шодӣ Давлатов ва кошонаи ҳусн ва маркази чакан, воқеъ дар хиёбони Исмоили Сомонии шаҳр аз тарафи соҳибкор Мавлуда Сафарова мавриди истифода қарор гирифт.   

Вобаста ба татбиқи ҳадафи чоруми стратегӣ – саноатикунонии босуръати мамлакат дар назар аст, ки то соли 2026 дар шаҳр 27 корхонаи хурду бузурги саноатӣ бо таъсиси беш аз 300 ҷойи нави корӣ сохта шавад. 

 

Суннати СОДИҚ, “Ҷумҳурият ”