Хабарҳо
ПРЕЗИДЕНТ, ҶАВОНОН ВА ИЛМИ МУОСИР
Таҳти чунин унвон дар Китобхонаи миллии Тоҷикистон бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба Рӯзи ҷавонон Форуми ҷумҳуриявӣ доир гардид.
Дар ин бора аз Кумитаи кор бо ҷавонон ва варзиш хабар доданд.
Дар Форум муовини Сарвазири Ҷумҳурии Тоҷикистон Матлубахон Сатториён, муовини Раиси Маҷлиси намояндагон Дилрабо Мансурӣ, раиси Кумитаи кор бо ҷавонон ва варзиш Абдулло Раҳмонзода, муовини вазири маориф ва илм Лутфия Абдулхолиқзода, раиси Кумитаи кор бо занон ва оила Ҳилолбӣ Қурбонзода, директори Маркази тадқиқоти стратегӣ Хайриддин Усмонзода, раиси Иттифоқи касабаи мустақили Тоҷикистон, Маликшо Неъматзода, муовини директори Агентии хизмати давлатӣ Дилноза Аҳмадзода, ректорони муассисаҳои таҳсилоти олии касбӣ, олимону муҳаққиқон, дорандагони Ҷоизаи давлатии ба номи Исмоили Сомонӣ, гирандагони Стипендияи президентӣ ва Стипендияи раиси шаҳри Душанбе, донишҷӯёни фаъоли муассисаҳои таҳсилоти олии касбӣ ва намояндагони дигар вазорату идораҳо ширкат варзиданд.
Форуми мазкур аз ду қисм - маросими ифтитоҳ ва кор дар бахшҳо иборат буд. Дар бахшҳои форум беш аз 30 мақолаи олимону муҳаққиқони ҷавон, ки дар самтҳои гуногун корҳои илмӣ анҷом додаанд, шунида шуд.
Матлубахон Сатториён ҷавонони Тоҷикистонро бахшида ба Рӯзи идашон табрик намуда, зикр кард, ки ҷавонон дар ҳама давру замон барои тамоми низомҳои сиёсии давлатдорӣ неруи пешбарандаи ҷомеа ба шумор мерафтанд. Асосгузори сулҳу ваҳдати миллӣ - Пешвои миллат, Президенти кишвар муҳтарам Эмомалӣ Раҳмон ба ин қишри ҷомеа таваҷҷуҳи хосса зоҳир менамоянд ва ин таваҷҷуҳ бесобиқа аст. Аз ин рӯ, ҷавонон дар ҳар фаъолияте набошанд, бояд баҳри халқу диёри худ аз сидқ хизмат намоянду дар ободии Ватан, ки такягоҳи аслии онҳост, ҳамаҷониба талош варзанд.
Абдулло Раҳмонзода иброз дошт, ки ҷавонони Тоҷикистони соҳибистиқлол неруи созандаи Ватан буда, нақши онҳо дар тараққиёти ҳамаи соҳаҳои ҳаёти давлат ва ҷомеа арзишманд ва назаррас мебошад. Имрӯзҳо ҷавонони ватандӯсту қавиирода ва далеру шуҷои мо дар ҳамаи соҳаҳои иқтисоди миллӣ ва ҳаёти ҷомеа аҳлона заҳмат кашида, дар пешрафти мамлакат ҳиссаи муносиб мегузоранд.
Гуфта шуд, ки Тоҷикистон миёни Иттиҳоди Давлатҳои Мустақил яке аз аввалинҳо шуда, қонуни асосии ҷавононро қабул кард. Дар заминаи Қонуни Ҷумҳурии Тоҷикистон «Дар бораи сиёсати давлатии ҷавонон» «Консепсияи миллии сиёсати давлатии ҷавонон», «Стратегияи сиёсати давлатии ҷавонон то соли 2020» барномаҳои марбут ба сиёсати давлатии ҷавонон, аз ҷумла «Барномаи миллии ҷавонони Тоҷикистон барои солҳои 1999-2000», «Барномаи давлатии тарбияи ватанпарастии ҷавонони Тоҷикистон барои солҳои 2002-2005», «Барномаи ҷавонони Тоҷикистон барои солҳои 2010-2011», «Барномаи рушди саломатии ҷавонон дар Ҷумҳурии Тоҷикистон барои солҳои 2011-2013», «Барномаи миллии рушди иҷтимоии ҷавонон барои солҳои 2013-2015, 2016-2018 ва 2019-2022» қабул гардид.
Инчунин, гуфта шуд, ки мувофиқи маълумот то 1 январи соли 2022 дар ҷумҳурӣ, 10445 иншооти варзиш новобаста аз шакли моликияташон ба қайд гирифта шуда, аз ин 129 варзишгоҳ, 7326 майдончаи варзиш, 1878 толори варзиш, 100 ҳавзи шиноварӣ, 40 маҷмааю марказҳои солимгардонӣ ва 804 иншооти махсуси варзиш, аз қабили тир, боулинг, фитнес ва клубҳои ихтиёрӣ мебошанд.
Ин дастовардҳо дар самти сиёсати давлатии ҷавонон ва варзиш ба шарофати Истиқлоли давлатӣ ва ғамхориву дастгириҳои Пешвои ҷавонпарвари миллат муяссар гардид.
Зикрулло РАҶАБ,
“Ҷумҳурият”
Баёни ақида (0) Санаи нашр: №: Мутолиа карданд: 2982