26 май дар таърихи дастаи «Рома» (Италия) ва корномаи мураббии номвари ҷаҳон Жозе Мауриню (Португалия) саҳифаи нав гиреҳ хӯрд. Тими итолиёвӣ зери роҳбарии мутахассиси 59-солаи португалӣ дар аввалин мусобиқаи аврупоӣ – Ҷоми конференсияи УЕФА пирӯз гашт. 

 

«Гладиатор»-рони Рум дар рақобати финалӣ (варзишгоҳи «Арена Комбётаре», Тирана, Албания, 19597 мухлис) бошгоҳи «Фейеноорд»-и Роттердами Нидерландияро бо ҳисоби 1:0 шикаст дода, ҷомро болои сар бардоштанд. Тӯби ғалабаоварро Николо Дзаноло дар дақиқаи 32-юм ба самар расонд.

Пас аз ин музаффарият Жозе Мауриню андешаҳояшро чунин баён мекунад: «Имрӯз мо таърих навиштем. Ман 11 моҳ дар «Рома» будам, аз лаҳзаи омадан, фаҳмидам, ки ин чи маъно дорад, онҳо инро интизор буданд. Тавре дар утоқи либоспӯшӣ ба бачаҳо гуфтам, мо ба ҳадафи дарпешгузоштаи худ расидем, яъне ба Лигаи Аврупо роҳ ёфтем. Мо тамоми мавсим аъло кор кардем. Лигаи Конференсия мусобиқае буд, ки аз аввал имкони ғолиб омаданро тахмин мезадем. Аммо, вақте дастаҳои «Лестер Сити», «Олимпик» ва «Фейеноорд» аз Лигаи Аврупо ба он ворид шуданд, рақобатҳо қавитар гаштанд. Имкони чанд холи дигар гирифтанро дар Серия А доштем, аммо ба Лигаи Конференсия омодагии ҷиддӣ медидем, зеро маблағи зиёд сарф карда будем. Ҳамин тавр, ин мусобиқот на танҳо дар таърихи «Рома», балки дар корномаи ман ҳам абадан сабт мегардад. Ба ман гуфтанд, ки танҳо ман, Алекс Фергюсон ва Ҷованни Трапаттони дар се даҳсолаи гуногун соҳиби ҷоиза шудаем. Ин суханон маро маҷбур мекунад, ки худамро каме солхӯрда эҳсос кунам!». 

Бояд гуфт, ки Лигаи Конференсия барои «Рома» аввалин ҷоизаи бузурги аврупоӣ дар 50 соли ахир аст. Ин тим бори охир дар соли 1972 дар Ҷоми англо-итолиёвӣ ғолиб омада буд.

Жозе Мауриню бошад, 5-умин ҷоми аврупоиро соҳиб шуд. Ӯ, қаблан бо тимҳои «Порту» (Лигаи Аврупо (2002/03, Лигаи чемпионҳо 2003/04), «Интер» (Лигаи чемпионҳо 2009/10) ва «Манчестер Юнайтед» (Лигаи Аврупо 2016/2017) пирӯз гардида буд.

 

Маҳмуд БАҲРОМ, шореҳи варзиш