Форуми байналмилалии содиротии «Бохтар Фуд-2022» бо дастури Пешвои муаззами миллат муҳтарам Эмомалӣ Раҳмон дар ҳамкорӣ бо Мақомоти иҷроияи ҳокимияти давлатии вилояти Хатлон ва Агентии содироти назди Ҳукумати Ҷумҳурии Тоҷикистон баргузор гардид.

Ҳадафи асосии ташаббуси чунин як чорабинии сатҳи баланди байналмилалӣ, ин дарёфти механизми мусоидат ба рушди содирот, муаррифии маҳсулоти тарутозаи кишвари офтобии Тоҷикистон дар арсаи дунё, устуворӣ ва рақобатпазирӣ дар бозори ҷаҳон ва пешгирии маҳсулоти воридотӣ арзёбӣ мегардад.

Дар форуми мазкур намояндагони 9 кишвари дунё, аз ҷумла Амороти Муттаҳидаи Араб, Эрон, Афғонистон, Россия, Қазоқистон, Ӯзбекистон ва Туркия ширкат варзида, қабл аз шартномабандии содиротӣ бо маҳсулоти тозаву экологии кишоварзони вилояти Хатлон шинос шуданд.

Воқеан, бо таҳкими муносибатҳои дӯстонаи Ҷумҳурии Тоҷикистон бо кишварҳои дӯст ва истифодаи иқтидори мавҷудаи содиротӣ тақозо мегардад, ки сабзавоту меваи вилояти Хатлон ва истеҳсоли корхонаҳои саноати хӯрокворӣ ба хориҷи кишвар содирот карда шаванд.

Меҳмонон ва намояндагони Ҳукумати Ҷумҳурии Тоҷикистон аз намоишгоҳи бошукӯҳи маҳсулоти содиротии деҳқонони вилоят, сифати аълои анвои ғизоӣ ва рақобатпазири маҳсулот дар берун аз марз шинос гардида, ҷиҳати ҳамкориҳои баъдӣ ҳавасмандӣ ва таваҷҷуҳ зоҳир намуданд. Дар намоишгоҳ сабзавоти тоза, меваҳои донакдори барои содирот равонашуда, обҳои нӯшокӣ, маҳсулоти хоҷагиҳои ҷангал, асали табиӣ, маҳсулоти ширӣ, саноатӣ ва полизиҳо, меваҳои ситрусиро ҳамчун намуна пешкаши ҳозирон ва ба умеди иртиботи баъдӣ ҳамоҳангӣ намуданд.

Таҷрибаи деҳқонони вилояти Хатлон давоми чанд соли охир дар тавлиди маҳсулоти содиротӣ бештар гардида, дар ҳамкорӣ бо ширкатҳои интиқолдиҳанда таҷриба касб кардаанд. Аз раванди чорабинӣ аён гардид, ки оянда имконоти мавҷуда тақвият меёбанд ва дар сурати пайдо шудани алоқамандони озуқа даромади иқтисодиашон даҳчанд  меафзояд.

Вилояти Хатлон аз калонтарин содироткунандагони маҳсулот маҳсуб ёфта, иқтидору захираҳои мавҷуда ҳоло низ зиёд мебошад.

Бояд гуфт, ки ҳамин шабу рӯз аз ҳисоби ноҳияҳои Ҷайҳун, Дустӣ Кӯшониён, Вахш, Хуросон, Абдураҳмони Ҷомӣ, Шаҳритус ва Қубодиён ҳазорҳо тонна анвои маҳсулоти тозаву безарар ва дар шароити хуби агротехникӣ тавлидшуда, ба берун аз марзи Ватан содирот мешаванд.

Меҳмонон доир ба пешниҳоди маҳсулоти тару тозаи кишвари офтобии Тоҷикистон баҳои баланд дода, зикр намуданд, ки ҳамкориҳоро дар содироти маҳсулот ба роҳ хоҳем монд.

Қисми дуюми чорабинӣ дар кохи фарҳанги шаҳри Бохтар бо иштироки меҳмонон баргузор гардид. Зимни ҷаласа муовини аввали Сарвазири Ҷумҳурии Тоҷикистон Давлаталӣ Саид ҳадафи ҷараёни Форуми байналмилалии «Бохтар Фуд-2022»-ро татбиқи дастурҳо аз Паёми Сарвари давлат дар рушди содирот, дарёфти роҳҳои рақобатнокии маҳсулот, баррасии имконоти марбут ба бахши содирот арзёбӣ намуд.

Форуми мазкур соли дуюм аст, ки бо дастури хоси Сарвари давлат баргузор гардида, минбаъд низ бо назардошти ҷалби сармояи хориҷӣ таҳким бахшида мешавад.

Ҷумҳурии Тоҷикистонро дар хориҷи кишвар аз лиҳози маҳсулоти тозаву табиӣ хуб мешиносанд ва раванди Форум роҳҳои нави густариши ҳамкориҳоро барои соҳибкорон ва кишоварзон боз мекунад.

Имсол вилояти Хатлон бояд беш аз 95 ҳазор тонна маҳсулоти деҳқонӣ содирот намояд. Акнун деҳқонон ва соҳибкоронро зарур аст, ки маҳсули меҳнаташон ба рақобат тобовар ва сифатнок бошад.

Раиси вилояти Хатлон Қурбон Ҳакимзода ҳузури меҳмонони олиқадри кишварҳои дӯстро аз номи Президенти Ҷумҳурии Тоҷикистон муҳтарам Эмомалӣ Раҳмон хайрамақдам гуфта, иқтидори истеҳсол ва содироти вилоятро дар қиёс бо солҳои пешин афзалтар маънидод намуд.

Бояд гуфт, ки дар доираи Форуми мазкур баимзорасонии як қатор созишномаҳои ҳамкорӣ ба маблағи 19 миллион доллари ИМА ба миён омад, ки ин ба содироти маҳсулоти ватанӣ ва баромадан ба бозорҳои нави фурӯши маҳсулот мусоидат менамояд.

 

Зокир ҲАСАН, "Ҷумҳурият "