Вазорати корҳои хориҷии Ҷумҳурии Тоҷикистон вобаста ба даргирии мусаллаҳона дар марзи Тоҷикистону Қирғизистон  изҳорот пахш намуда, аз такрор ёфтани таҷрибаи аз ҷониби Қирғизистон сарфи назар кардани мувофиқаҳои ҳосилшуда ибрози нигаронӣ кард. 

 Дар изҳорот гуфта мешавад, ки 3 июни соли 2022, соати 10:40 бо вақти маҳаллӣ дар минтақаи таҳти масъулияти дидбонгоҳи сарҳадии “Кех”-и Ҷамоати деҳоти Ворухи шаҳри Исфара дар натиҷаи марзшикании ҳадафмандонаи ҳарбиёни Ҷумҳурии Қирғизистон ба ҳудуди Ҷумҳурии Тоҷикистон миёни сарҳадбонони тоҷик ва ниҳодҳои ҳарбии кишвари ҳамсоя муноқишаи мусаллаҳона ба вуқуъ пайваст.

Муноқиша бинобар аз ҷониби хизматчиёни ҳарбии Қирғизистон беэътиноӣ намудани талаби қонунии марзбонони тоҷик ҷиҳати тарки ҳудуди Тоҷикистон рух дод. Дар ҷавоб ба талаби сарҳадбонони Тоҷикистон ҳарбиёни қирғиз мавқеи ҷангӣ гирифта, нахуст ба тарафи дидбонгоҳи сарҳадии «Кех» оташ кушоданд. Пас аз ҷалби неру ва техникаи иловагӣ аз ҷониби ҳарбиёни Қирғизистон вазъият мураккаб гардид: «Дар натиҷаи оташи ҷавобии сарҳадбонони тоҷик аз яроқи оташфишон, ҳарбиёни қирғиз аслиҳаи маҷмуӣ ва миномётҳоро ба самти мавзеъҳои аҳолинишини Тоҷикистон истифода бурданд. Сарҳадбонони Қирғизистон изҳор доштанд, ки дар муноқишаи сарҳадӣ қувваҳои ниҳодҳои алоҳидаи мақомоти қудратии Қирғизистон, ки ба ҳайати Хадамоти сарҳадии он ҷониб шомил нестанд, истифода мешаванд.  

Дар натиҷаи гуфтушунидҳои фаврии бо ташаббуси ҷониби Тоҷикистон доиршуда, соати 13:15 бо вақти маҳаллӣ оташбас муяссар гардид. Гузашта аз ин, соати 14:15 бо мақсади муайян намудани ҳолати муноқишаи мусаллаҳона ҷониби Тоҷикистон интиқоли намояндагони Қирғизистонро ба маҳали ҳодиса, воқеъ дар ҳудуди Тоҷикистон ташкил намуд». 

Дар баёния таъкид мегардад, ки аз тарафи Қирғизистон истифода гардидани ниҳодҳои мақомоти қудратии ба ҳайати Хадамоти сарҳадии кишвари ҳамсоя шомилнабуда, чораи ғайриқобили қабул ва боиси мураккаб гардидани вазъият дар хатти сарҳади давлатӣ мебошад.  Илова бар ин, ҳолати мазкур хилофи мувофиқаҳои байни  мақомоти сарҳадии ҷонибҳо, ки 12 март ва 13 апрели соли 2022 ҳосил шудаанд, дониста мешавад.

- Тоҷикистон амали иғвоангезонаву ҳадафноки ҷониби Қирғизистонро маҳкум намуда, аз риояи қатъии ҳамаи мувофиқаҳои бадастомада ҷиҳати пешгирии чунин муноқишаҳо дар оянда, даъват ба амал меорад, - омадааст дар изҳороти Вазорати корҳои хориҷӣ.

 

«Ҷумҳурият»