Маҷаллаи маъруфи англисзабони “Trends”- и Ҷумҳурии Исломии Эрон таҳти унвони «Ҷумҳурии Тоҷикистон дар ташаббусҳои глобалӣ дар соҳаи об пешсаф аст» матлаби фарогиреро ба нашр расонд, ки дар он аҳамияти ҷаҳонии ташаббусҳои байналмилалии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бозтоб шудаанд. 

Дар ин бора сомонаи Сафорати Ҷумҳурии Тоҷикистон дар Ҷумҳурии Исломии Эрон хабар дод. Бино ба гузориши манбаъ, дар мақола чаҳор ташаббуси байналмилалии Президенти Ҷумҳурии Тоҷикистон вобаста ба об, аз ҷумла «Соли байналмилалии оби тоза» (2003), Даҳсолаи байналмилалии амалиёт «Об барои ҳаёт, 2005 – 2015», «Соли байналмиалии ҳамкорӣ дар соҳаи об» (2013) ва Даҳсолаи байналмилалии амал «Об барои рушди устувор, 2018 – 2028» шарҳу тавзеҳ ёфта, аҳамияти бузурги ин иқдомҳои башардӯстона дар ҳали мушкилоти ҷаҳонии об таъкид шудааст. 

Дар матлаб хулоса мешавад, ки «Ташаббусҳои Президенти муҳтарами Тоҷикистон вобаста ба об, пеш аз ҳама, ба таҳкими ҳамкорӣ ва танзими муносибатҳо дар ин соҳаи ҳаётан муҳим нигаронда шуда, назари навро дар истифодаи захираҳои об дар минтақа ва ҷаҳон талқин менамоянд ва барои ноил шудан ба Ҳадафҳои Рушди Устувор заминаи пойдор мегузоранд».

Ин дар ҳолест, ки феълан ҷомеаи ҷаҳонӣ ҷиҳати татбиқи ташаббуси чаҳоруми Тоҷикистон вориди амал шудаву кишвари мо дар меҳвари таваҷҷуҳи бештар қарор дорад. Ин далелро баргузории Конфронси дуюми байналмилалии сатҳи баланд бахшида ба Даҳсолаи байналмилалии амал «Об барои рушди устувор, солҳои 2018 – 2028» таҳти унвони «Пешбурди амал ва шарикӣ дар соҳаи захираҳои об дар сатҳҳои маҳаллӣ, миллӣ, минтақавӣ ва ҷаҳонӣ», ки 6 – 9 июн дар шаҳри Душанбе баргузор гардид, тақвият мебахшад.

Ин нишасти дорои аҳамияти ҷаҳонӣ зери таваҷҷуҳи расонаҳои сершумор қарор гирифта, беш аз 500 хабарнигори воситаҳои ахбори оммаи дохилию хориҷӣ онро мустақиман пӯшиш доданд. Ҳудуди 2000 меҳмони хориҷӣ дар суханрониҳои расмиву ғайрирасмӣ аз ибтикороти башардӯстонаву амалгароёнаи Пешвои миллат муҳтарам Эмомалӣ Раҳмон ситоиш намуда, ба корҳои тадорукотӣ ҷиҳати дар сатҳи баланди ташкилӣ созмон додани чунин як ҳамоиши бонуфуз баҳои баланд доданд. 

Фирӯз РАҲМОНИЁН,  «Ҷумҳурият»