12 июн нисбат ба саркардагони гурӯҳҳои муташаккили ҷиноятии шаҳри Хоруғ Мазоров Хурсанд Мирзоҳаётович ва Раҷабов Зоир Карамхудоевич, солҳои таваллудашон 1972, зода ва истиқоматкунандагони шаҳри Хоруғ, амалиёти махсус гузаронда шуд. Аз тарафи прокуратураи Вилояти Мухтори Кӯҳистони Бадахшон нисбат ба Мазоров Хурсанд ва Раҷабов Зоир қаблан бо якчанд моддаи Кодекси ҷиноятӣ парвандаҳои ҷиноятӣ оғоз шуда буд.

 

Тавре АМИТ «Ховар» бо такя Ситоди байниидоравии таъмини амният ва тартиботи ҷамъиятӣ дар ВМКБ хабар дод, номбурдаҳо барои пешбурди тафтишот ба мақомоти ҳифзи ҳуқуқ чандин маротиба расман даъват шудаанд. Аммо онҳо ҳар дафъа барқасдона аз иҷрои талаботи қонунии мақомоти маъмурӣ саркашӣ мекарданд.

Ҳангоми чорабинии дастгиркунӣ Хурсанд Мазоров  ва Зоир Раҷабов  ба талаботи воҳидоти таъиноти махсус, дар бораи ихтиёран супоридани худ ба мақомоти ҳифзи ҳуқуқ итоат накарда, муқобилияти мусаллаҳона нишон дода, аз норинҷакҳои дастии Ф-1 ва автомати Калашников истифода намуданд. Дар натиҷаи оташи ҷавобӣ ҷинояткорон безарар гардонда шуданд.

Аз ҷойи  ҳодиса як пулемёти дастии Калашников, як пулемёти Калашников, 11 автомати Калашников бо 5715 тир ва 66 тирдон, 9  гранатомёти дастии зиддитанкӣ бо 546 тир, 2 милтиқи мерганӣ бо дурбин, 3 тапончаи Макаров бо 198 тир ва 10 тирдон, 36 норинҷаки гуногунтамға бо 15 фурӯзонак, 20 гулӯлаи гранатомёти зиддитанкӣ, 2 дурбини мергании шабона, 3 тиризермили гранатомёт, 1 найзакорд, 19 фишанги тарканда, 5 мухобира, 18 қуввадиҳандаи гранатомёти дастии зиддитанкӣ, 3 телефони сенсорӣ, 4 телефони одӣ бо симкорти афғонӣ, 1 телефони моҳворавӣ бо чор симкорт, 1 аксбардори “Кодак”, 1 мавҷқабулкунаки мухобираи “Кодак”, 700 доллари ИМА, 60 сомонӣ, 7 камарбанди ҳарбӣ барои тирдон, 7 ҷуфт либоси ҳарбии саҳроӣ, 1 дурбини шабона, ду нақлиёти сабукрав, ки аз  бордони онҳо лавозимоти ҷангии гуногунтамға дарёфт гардид, тибқи талаботи қонун мусодира ва ҳуҷҷатнигорӣ карда шуд.

Ҳамзамон, дар рафти амалиёт 10 нафар алоқаҳои ҷиноятии онҳо дастгир гашт. Аз ҷумла, ҳангоми кофтуков аз манзили истиқоматии 2 нафари онҳо - Имомназар Шоиширинов  2 автомати Калашников бо 3 тирдон, 120 тири қутраш 7,62 мм ва аз хонаи шахсии Муслим Шерзамонов 1 автомати Калашников бо 1 тирдон, 18 тири қутраш 5,45 мм, 2 норинҷаки Ф-1 ёфта, тибқи талаботи қонун мусодира ва ҳуҷҷатгузорӣ гардид.

Тафтишот нисбат ба парвандаҳои мазкур аз ҷониби прокуратураи вилоят идома дорад.

Инчунин, маркази матбуоти ВКД хабар дод, ки 11 июни соли 2022 дар натиҷаи гузарондани амалиёти махсус саркардагони гурӯҳҳои муташаккили ҷиноятии шаҳри Хоруғ Аёмбеков Толиб Абдурамонович, Шанбиев Мунаввар Наврӯзбекович ва Гулобов Ниёзшо Аслишоевич дастгир ва ба ҳабс гирифта шуданд.

Номбурдаҳо як қатор ҷиноятҳои вазнин ва махсусан вазнин, аз ҷумла куштор, авбошӣ, ғоратгарӣ, қочоқ ва муомилоти ғайриқонунии маводи мухаддир, силоҳу аслиҳа ва сангҳои қиматбаҳо, ташкили иттиҳоди ҷиноятӣ, бандитизм, бетартибиҳои оммавӣ, барангехтани кинаву адовати маҳаллӣ, содир кардаанд.

Нисбат ба дастгиршудагон тафтишоти пешакӣ идома дорад.

 

Л. ШАРИФЗОДА, «Ҷумҳурият»