Дар толори Мақомоти иҷроияи ҳокимияти давлатии вилояти Хатлон ҷаласаи корӣ оид ба таъмини ёрии ҳуқуқӣ ба сокинон ва муаррифии ҳуқуқшиносони Муассисаи давлатии «Маркази ёрии ҳуқуқӣ»-и Вазорати адлияи Ҷумҳурии Тоҷикистон бо ширкати вазири адлия Музаффар Ашуриён, муовинони раиси вилоят, намояндагони сохторҳои қудратӣ, раисони шаҳру ноҳияҳо ва намояндагону ҳуқуқшиносон баргузор гардид. 

 

Раиси вилояти Хатлон Қурбон Ҳакимзода иброз дошт, ки мақсад аз баргузор намудани ҷаласаи корӣ таҳким бахшидан ба фаъолияти ҳуқуқшиносони Муассисаи давлатии «Маркази ёрии ҳуқуқӣ»-и Вазорати адлияи Ҷумҳурии Тоҷикистон ҷиҳати беҳтар ба роҳ мондани таъмини ёрии ҳуқуқӣ ба сокинон мебошад.

Ҷумҳурии Тоҷикистон узви комилҳуқуқи Созмони Милали Муттаҳид буда, як қатор санадҳои байналмилалӣ оид ба ҳуқуқи инсонро эътироф кардааст. Ҳукумати Ҷумҳурии Тоҷикистон кӯшиш ба харҷ медиҳад, ки ин санадҳои байналмилалӣ дар ҳудуди кишвар амалӣ шаванд. Расондани ёрии ҳуқуқӣ ба қишрҳои осебпазири ҷомеа яке аз афзалиятҳои сиёсати ҳуқуқии Ҷумҳурии Тоҷикистон ба ҳисоб меравад. 

 Музаффар Ашуриён тазаккур дод, ки аз соли 2016 инҷониб Вазорати адлия якҷо бо шарикони рушд – Барномаи рушди Созмони Милали Муттаҳид ва филиали “Хелветас Свисс Интеркооперейшен” дар Тоҷикистон дар доираи лоиҳаи “Волоияти қонун ва дастрасӣ ба адолат” расондани ёрии ҳуқуқӣ ба қишрҳои осебпазири ҷомеаро амалӣ карда истодааст. Барои роҳандозии Барнома бо қарори Ҳукумати Ҷумҳурии Тоҷикистон аз 28 ноябри соли 2015, Муассисаи давлатии “Маркази ёрии ҳуқуқӣ”-и Вазорати адлияи Ҷумҳурии Тоҷикистон таъсис ёфт. 

Зикр гардид, ки мақсади Муассиса ташаккул додани асосҳо барои инкишоф ва мукаммалгардонии минбаъдаи низоми давлатии ёрии ҳуқуқии дастрас ва ихтисоснок барои аҳолӣ мебошад. 

Дар ҳудуди вилояти Хатлон дар доираи иҷрои барнома то имрӯз дар маҷмуъ, даҳ маркази ёрии ҳуқуқӣ таъсис ёфтааст, ки ба муштариён хизмат мерасонад.

 

Зокир ҲАСАН,  «Ҷумҳурият»