Дар шаҳри Бохтар Конфронси байналмилалии илмӣ - амалии "Мактаби сиёсии Пешвои миллат" баргузор шуд. Дар ҳамоиш, ки бо ташаббуси Кумитаи иҷроияи Ҳизби Халқии Демократии Тоҷикистон дар вилояти Хатлон ба ифтихори 25-солагии Ваҳдати миллӣ роҳандозӣ гардид, раиси вилояти Хатлон Қурбон Ҳакимзода, муовини якуми раиси ҲХДТ Абдуҷаббор Азизӣ, ёрдамчии Президенти мамлакат оид ба масъалаҳои рушди иҷтимоӣ ва робита бо ҷомеа Эмомалӣ Насриддинзода, олимону муҳаққиқон ва ходимони давлатию ҷамъиятӣ иштирок карданд.

Раиси вилояти Хатлон қайд кард, ки Ҳизби  Халқии  Демократии  Тоҷикистон  таҳти сарварии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар давраи фаъолияташ собит сохт, ки метавонад ҷомеаро атрофи ғояҳои созандагиву бунёдкорӣ муттаҳид намуда, бо амалӣ гардондани барномаҳои мушаххас халқи тоҷикро ба сӯи қуллаи мурод муваффақона раҳнамоӣ намояд.

- Як нуктаи дигарро ёдовар мешавам, ки воқеан ҳам, баёнгари мардумнавозӣ ва ихлосу маҳбубияти Президенти мамлакат муҳтарам Эмомалӣ Раҳмон дар байни халқ мебошад. Тайи ин муддат дар мушкилтарин ҳолатҳо ба дурдасттарин нуқоти кишвар сафар карда, бо вазъи зиндагии мардум бевосита шинос мешаванд. Аз забони мардуми манотиқи дурдасти кӯҳистон шунидаем, мегуфтанд, ки дар 70 соли замони шуравӣ ягон роҳбари аввали ҷумҳурӣ боре ҳам ба назди онҳо наомада буд. Пешвои миллат Тоҷикистонро ба хонаи умеди тоҷикони тамоми дунё табдил доданд, -  афзуд раиси вилоят.

Қурбон Ҳакимзода дар идома гуфт, ки мактаби сиёсии Пешвои миллат мактаби миллии давлатдорӣ, таъмини ваҳдат ва суботи комили ҷомеаи Тоҷикистон, бунёди зерсохторҳои ваҳдати миллӣ, узви комилҳуқуқи ҷомеаи ҷаҳонӣ гардидани Тоҷикистон, эҳё ва меросбарӣ аз арзишҳои фарҳангиву таърихии миллат ва дигар дастовардҳо низ аз муҳимтарин комёбиҳое мебошанд, ки бо азму талош ва ҷоннисориҳои Пешвои миллат муҳтарам Эмомалӣ Раҳмон ба даст омадаанд.

Заминаҳои  ташаккул  ва  инкишофи фаъ-олияти Эмомалӣ Раҳмон ҳамчун Сарвари сиёсии сатҳи умумидавлатӣ ва умумимиллӣ қатъ намудани ҷанги шаҳрвандӣ, барқарор кардани сохти конститутсионӣ, баргардондани гурезагон, таъмини заминаҳои мухталифи фаъолияти давлат ва ҷомеа ба ҳисоб мераванд. 

Конфронс аз ҷиҳати мазмуну интихоби мавзуъ ниҳоят муҳиму арзишманд буда, таҳқиқу омӯзиши паҳлуҳои он барои аҳли илм, хизматчиёни давлатӣ ва кормандони ниҳодҳои ҷомеаи шаҳрвандӣ қобили мулоҳиза ба ҳисоб меравад. 

 

Зокир ҲАСАН, «Ҷумҳурият»