Ба чанд нафар вакили Маҷлиси намояндагон ордену медалҳои ҷашнӣ, нишонҳои сарисинагии хотиравии 30-солагии Истиқлолияти давлатӣ, Ифтихорномаи Ассамблеяи байнипарлумонии Иттиҳоди Давлатҳои Мустақил ва Ифтихорномаи Ассамблеяи парламентии Созмони Аҳдномаи амнияти дастаҷамъиро дар маросими тантанавӣ тақдим карданд. 

Дар ин бора аз Маҷлиси намояндагон хабар доданд.

Мукофотҳо ба вакилон барои хизматҳо дар рушд ва таҳкими парламентаризм, саҳмгузорӣ дар рушд ва такмили асосҳои ҳуқуқии фаъолияти ИДМ, таҳкими робитаҳои байналмилалӣ ва ҳамкории байнипарламентӣ тақдим гардиданд.

 

 

Вохӯрӣ бо муовини Дабири кулли СММ 

Ҳайати Ҷумҳурии Тоҷикистон таҳти роҳбарии вазири энергетика ва захираҳои оби Ҷумҳурии Тоҷикистон Далер Ҷумъа ва муовини вазири корҳои хориҷӣ Шараф Шерализода дар ҳошияи Конфронси Созмони Милали Муттаҳид оид ба уқёнус дар Лисcабон бо муовини Дабири кулли СММ оид ба масоили иқтисодӣ ва иҷтимоӣ Лю Женмин мулоқот кард.

Дар суҳбат натиҷаҳои Конфронси дуюми байналмилалии сатҳи баланд оид ба Даҳсолаи байналмилалии амал "Об барои рушди устувор, солҳои 2018-2028" дар Ҷумҳурии Тоҷикистон, инчунин, масъалаҳои омодагӣ ба баргузории Конфронси СММ оид ба баррасии миёнамуҳлати даҳсолаи об, ки соли 2023 дар  Ню-Йорк баргузор мегардад, баррасӣ шуданд.

 

 

Имзои Созишнома оид ба маблағгузорӣ

Маросими баимзорасонии Созишнома оид ба маблағгузорӣ (лоиҳаи баланд бардоштани омодагӣ ва устуворӣ ба офатҳои табиӣ дар Тоҷикистон) байни Ҷумҳурии Тоҷикистон ва Ассотсиатсияи байналмилалии рушд баргузор гашт. Созишномаро вазири молия Файзиддин Қаҳҳорзода ва намояндаи доимии Бонки ҷаҳонӣ дар Тоҷикистон Озан Севимли имзо карданд.

Вазорати молия хабар дод, ки ҳадафи лоиҳа баланд бардоштани устувории роҳҳои муҳими автомобилгард, пурзӯр намудани иқтидорҳо вобаста ба идоракунии хатари офатҳои табиӣ, дар ҳолати буҳронӣ ё фавқулода вокуниши фаврӣ ва самарабахш ба ҳолатҳои болозикр мебошад.

Арзиши умумии лоиҳа ба 50 млн доллари амрикоӣ баробар буда, татбиқи он соли ҷорӣ оғоз ёфта, анҷоми он дар соли 2027 дар назар аст.

 

 

Раванди амалишавии ислоҳоти милитсия

Дар доираи барномаи ислоҳоти милитсия аз ҷониби шарикони рушд ба Вазорати корҳои дохилӣ се воситаи нақлиёти сайёр тақдим гардид. Дар чорабинӣ вазири корҳои дохилӣ Рамазон Раҳимзода ва сафири Дафтари барномавии Созмони амният ва ҳамкорӣ дар Аврупо дар Душанбе Вук Жугич ширкат варзиданд.

Тавре маркази матбуоти Вазорат хабар дод, зимни қабули воситаҳои нақлиёти сайёр вазир зикр намуд, ки нақлиётҳои воридгардида бо тамоми таҷҳизоти замонавӣ муҷаҳҳаз буда, барои ҳайати гурӯҳи кории нуқтаи сайёри милитсия, ки бо сокинон дар минтақаҳои кишвар барои пешгирӣ аз ҷинояту ҷинояткорӣ корҳои фаҳмондадиҳӣ мебаранд, мусоид мебошад.

 

 

Даври асосии имтиҳонҳои дохилшавӣ ба муассисаҳои таълимӣ оғоз мегардад

Аз 1 июл даври  асосии имтиҳонҳои марказондаи дохилшавӣ ба  муассисаҳои таълимии таҳсилоти миёна ва олии касбӣ – қисмҳои А (имтиҳон дар заминаи таҳсилоти умумӣ) ва Б (имтиҳон дар заминаи таҳсилоти умумии асосӣ) оғоз мегардад, - иттилоъ дод маркази матбуоти Маркази миллии тестӣ.

Марказҳои имтиҳонӣ дар заминаи муассисаҳои таълимии таҳсилоти миёнаи умумии 18 шаҳру ноҳияи интихобшудаи ҷумҳурӣ (Исмоили Сомонӣ, Сино, Фирдавсӣ, Шоҳмансур, Рашт, Хуҷанд, Истаравшан, Конибодом, Панҷакент, Бобоҷон Ғафуров, Бохтар, Кӯлоб, Восеъ, Данғара, Кӯшониён, Ҷалолиддини Балхӣ, Шаҳритус ва Хоруғ) ташкил карда мешаванд.

Мувофиқи тартиб шумораи довталабон дар ҳар як синфхонаи имтиҳонӣ бояд аз 15 нафар зиёд бошад.