4 июл Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Ҷумҳурии Ӯзбекистон муҳтарам Шавкат Мирзиёев суҳбати телефонӣ карданд.

Сарварони давлатҳо масъалаҳои мубрами муносибатҳои Тоҷикистон ва Ӯзбекистонро дар партави тавофуқҳое, ки ҳангоми сафари расмии Президенти Ҷумҳурии Тоҷикистон ба Ҷумҳурии Ӯзбекистон рӯзҳои 2 – 3 июни соли 2022 ҳосил шуда буданд, баррасӣ намуданд.

Ҳамчунин, доир ба масъалаҳои амнияти минтақавӣ ва ҳамкории ду кишвар дар чаҳорчӯби созмонҳои минтақавӣ ва байналмилалӣ табодули назар сурат гирифт.

Президенти Ҷумҳурии Тоҷикистон аз талошҳои роҳбарияти давлати ҳамсоя барои ба эътидол овардани вазъ дар Қарақалпоқистони Ҷумҳурии Ӯзбекистон изҳори ҷонибдорӣ карданд.