Боксёри тоҷик Шаббос Негматуллоев дар I мусобиқаи байналмилалӣ оид ба бокс «Ҷоми Элорда – 2022» (Нур-Султон, Қазоқистон) медали биринҷӣ гирифт.

Шаббос (-80кг) бар Баиржан Баигоншеков (Қазоқистон) ва Салгадо Брайан Леон (Куба) ғолиб омада, дар нимфинал аз Танглатиан Аербеке (Чин) мағлуб шуда, ҷои сеюмро ишғол кард.

 

 

Ду медали паҳлавонон аз Чемпионати Осиё

Исоҷон Нураҳмадов (-68кг) ва Муҳаммад Абдуҳакимзода (-62кг) дар рӯзи аввали Чемпионати Осиё оид ба гӯштӣ миёни наврасони то 15-сола ва ҷавонони то 20-сола (Манама, Баҳрайн) соҳиби нишонҳои нуқраву биринҷӣ шуданд.

Ба маълумоти Федератсияи гӯштии Тоҷикистон, мусобиқот то 10 июл сурат гирифта, кишвари моро 8 паҳлавон намояндагӣ мекунад.

 

 

Душанбе мизбони якумин Чемпионати CAFA байни тимҳои бонувон

Дар аввалин Чемпионати Ассотсиатсияи футболи Осиёи Марказӣ (CAFA) байни тимҳои миллии бонувон мунтахабҳои Қирғизистон, Тоҷикистон, Туркманистон, Ӯзбекистон ва Эрон ширкат мекунанд.

Бар пояи иттилои ФФТ, чемпионат 8 – 20 июл дар Варзишгоҳи марказии ҷумҳуриявии шаҳри Душанбе мегузарад. 

Тибқи низомнома, он дар як давр баргузор мешавад. Дар ибтидо Қирғизистон бо Эрон ва Туркманистон бо Тоҷикистон (8 июл) вомехӯранд.

 

 

Натиҷаи 4 бозии даври 11-уми Лигаи олӣ

Дар даври 11-уми Лигаи олии Чемпионати Тоҷикистон оид ба футбол садрнишини он – «Хатлон» дар меҳмонӣ бо «Равшан-З» мусовӣ (0:0) кард. 

Натиҷаи се бозии дигар: «Равшан-К» – «Эсхата» – 2:0, «Истиқлол» – «Регар-ТадАЗ» – 3:1 ва КМВА – «Файзканд» – 1:2.

 

 

Омодагии футзалбозони тоҷик ба Ҷоми Осиё – 2022

Мунтахаби футзали кишвар, зери роҳбарии Пайрав Воҳидов, дар доираи омодагӣ ба марҳилаи ниҳоии Ҷоми Осиё – 2022 бо тими Ӯзбекистон се бозии дӯстона (14, 15 ва 17 июл, Ҷиззах) анҷом медиҳад.  

Ёдовар мешавем, ки дар Ҷоми Осиё (27 сентябр – 8 октябр, Кувайт) футзалбозони мо дар гурӯҳи «В» бо Баҳрайн (27 сентябр), Ӯзбекистон (29 сентябр) ва Туркманистон (1 октябр) рақобат мекунанд. 

 

Маҳмуд БАҲРОМ, шореҳи варзиш