Дар фароғатгоҳи соҳавии кӯдаконаи “Ширкент”- и Кумитаи иттифоқи касабаи ҶСК “Ширкати алюминийи тоҷик”, воқеъ дар шаҳри Турсунзода, маросими ифтитоҳи басти дуюм ботантана баргузор гардид. Бо иштироки фаъоли истироҳаткунандагон чорабиниҳои дилангезу гуворо, рақсу сурудхонӣ, барномаҳои гуногуни таълимию тарбиявӣ пешкаши иштирокчиён гардонда шуд. Хурсандии кӯдакон ҳадду канор надошт.

Чунонки Ҷалолиддин Холов, директори лагери “Ширкент”, иброз дошт, соли равон тибқи нақша дар чор баст, дар ҳар як баст 300 - нафарӣ наврасу кӯдакон ба истироҳату солимгардонӣ фаро гирифта мешаванд. Дар басти якум қариб 400 нафар ва дар басти  дуюм 320 нафар кӯдакону наврасон аз мактаб-интернатҳои ҷумҳуриявии шаҳру ноҳияҳои  Душанбе, Ҳисор, Панҷакент, Шамсиддин Шоҳин, Ҷалолиддин Балхӣ,  Ёвон, Шаҳринав ва оилаҳои камбизоати корхонаю муассисаҳои давлатӣ, аз ҷумла соҳаҳои сохтмон, бофандагӣ ва хоҷагиҳои коммуналӣ, ба ин фароғатгоҳ омаданд. Аз ин теъдод дар басти  якум  зиёда аз 150 нафар  ва дар басти дуюм  50 нафарро  кӯдакони ятим  ташкил медиҳанд. Айни ҳол дар ин лагер иқдоми хубе роҳандозӣ гардидааст: ба ҳамаи бачаҳои ятиме, ки дар ин ҷо истироҳат мекунанд, аз ҷониби кормандони ширкат  туҳфаҳо, аз қабили сарулибос,  тақдим  карда мешаванд.  

Дар фароғатгоҳ тамоми шароитҳо барои истироҳати кӯдакону наврасон фароҳам оварда шудааст. Ҳайати педагогӣ ва мураббиён тадбирҳои заруриро роҳандозӣ мекунанд, то ин ки истироҳати кӯдакон дар сатҳи баланду хотирмон гузарад. 

-  Аз имрӯз спартакиада - олимпиадаи лагер аз рӯи тамоми намудҳои варзиш оғоз мегардад. Мусобиқа  бо иштироки 8 даста аз рӯи бозиҳои футбол, баскетбол, шашка, шоҳмот, тенниси рӯи миз, давидан, шиноварӣ байни духтарон ва писарон дар байни отрядҳо гузаронда мешавад. Ғолибон бо ифтихорномаю диплом ва туҳфаҳои таъсиснамудаи Иттифоқи касабаи ширкат сарфароз мегарданд. Дар лагер, инчунин, аз ҷониби маъмурият маршруткаи махсус таъсис дода шудааст, ки кӯдаконро ҳар рӯз аз соати 5 - 6 – и субҳ  бо навбат ба саёҳат мебарад.  Инчунин, кӯдакон аз осорхонаи корхонаи ҶСК “Ширкати алюминийи тоҷик” дидан намуда, бо кору фаъолияти корхонаи саноатии машҳур дар кишвар шинос мешаванд, - гуфт Ҷалолиддин Холов.    

         

Матлубаи АБДУҚАҲҲОР “Ҷумҳурият”