Шӯхиҳои Аловуддинро ба воситаи телевизион бо завқ тамошо мекардаму ҳеҷ  гумон надоштам, ки рӯзе бо ин ҳаҷвнигори барҷаста рӯ ба рӯ мешавам. Сабабгори нахустшиносоӣ ва, баъдан, ба дӯстии қавӣ гузаштани муносибатҳои мо бо Ҳунарпешаи халқии Тоҷикистон Аловуддин Абдуллозода бародараш Музаффар Абдуллозода гардид. Бо Музаффар аз соли 2003 шиносоӣ дорем. Ҳамон сол ӯро аз вазифаи прокурори ҳарбии гарнизони Хатлон раиси суди шаҳри Қӯрғонтеппа (ҳоло Бохтар) таъин намуданд. Соли 2014 Музаффар ба ҳайси раиси суди ноҳияи Фирдавсии шаҳри Душанбе ба марказ омад. Ӯ рӯзе занг зада хоҳиш намуд, ки ба ҳузураш равам. Чун ба наздаш ҳозир шудам, дарҳол ба сари мақсад омад.

 

- Бародарам Аловуддин дар бораи падари бузургворам Ҷаъфар Абдуллозода китобе омода намудааст. Мехостам, ки шумо онро хонда таҳрир намоед.

- Аловуддин бародаратон мешавад? - савол додам.

- Бале, - тасдиқ кард роҳбари идора ва илова намуд. - Мо 6 нафар бародаронем…

Китобро хонда таҳрир кардам ва ду - се боби дигар илова намуда, аз иҷрои вазифа ба Музаффар ҳисобот додам.

- Додарам Аловуддин дар назди бинои Вазорати фарҳанг шуморо интизор аст, - гуфт раиси суд ва хоҳиш намуд, ки флешкаро ба муаллиф супорам.

Аловуддинро дар дохили нақлиёти шахсиаш дида, худро шиносонда, флешкаро ба дасташ додам. Бо чеҳраи кушод ва лаби пурханда ба нишастан таклиф намуд.

- Ҳамроҳ каме дар пойтахт сайругашт менамоем, ин тавр аз наздик шинос мешавем. Ба фикрам шумо адиб ҳастед ва хоҳиш мекунам, ки барои ман ҳаҷвияе нависед, то ки, ба ин васила, ба воситаи барномаи «Шӯхиҳои Аловуддин» шуморо тарғибу ташвиқ намоям.

- Бо ҷону дил, - гӯё мо кайҳо шиноси қадрдон будем, ки суҳбатамон гарму хотирмон сурат гирифт. - Ҳаҷвияро омода ва шуморо қарздор менамоям.

- Саломи дӯст бе тамаъ нест, - аз ин ҳаҷви мувофиқ ҳар ду баробар хандидем. - Бо чӣ маро қарздор менамоед? - хушҳолона савол партофт ҳаҷвнигор ва мошинро ба ҳаракат даровард.

- Драмаи «Карими Шиш» - ро ба саҳна мегузоред?, - хоҳишамро ба забон овардам.

- Ҳадия ба ҳадия қарз гуфтаи мардум рост будааст, - аз ин шӯхии навбатиаш боз ҳар ду бо завқ хандидем.

Ҳамин тариқ, байнамон дӯстӣ барқарор гардид ва ҳар гоҳе, ки ба шаҳри Бохтар мерафтам ҳатман ба ҳузураш мешитофтам ва ӯ дар навбати худ гоҳ - гоҳе занг зада аз ҳолу аҳволам бохабар мешуд.

Моҳи ноябри соли 2015 занг зада гуфт:

- Шуморо ба барномаи ҷашни 75 - солагии зодрӯзи устод Убайдулло Раҷабов ба Кохи Борбад даъват менамоям. Даъватномаатон дар кисаи ман – Аловуддин, - хандида маро хурсанд намуд. - Шуморо дар даромадгоҳ интизорам.  

Саросема ба Кохи Борбад шитофтам ва ба туфайли ғамхории дӯстам аз барномаи рангину пурмазмуну серхандаи устоди ҳаҷв баҳра бурдам.

Пас аз чанд сол, аниқтараш моҳи феврали соли 2022, дӯсти қадрдонам боз занг зад:

- Мутасаддии баргузории Ҷашни Наврӯз дар ноҳияи Ҷалолиддини Балхӣ мебошам, - бо овози ширадораш хабар дод Аловуддин. - Ба ин ҷашнвора шуморо ҳатман даъват менамоям.

Хеле хурсанд шудам. Чӣ хел ҳам хурсанд нашавам? Ман дар ҳамин макон ба воя расидаам.  Фарорсии Ҷашни Наврӯзро бетоқатона интизор будам, вале аз куҷо медонистам, ки ин занги охирини дӯсти мушфиқу меҳрубонам мебошад…

Ба хабари маргаш бовар намекардам. Ба чанд дӯсту шиносам занг задам. Ҳамаи онҳо, яке бо ҳасрат, дигаре бо алам, сеюмӣ бо гиря, чорумӣ бо доду фиғон ин хабари шумро тасдиқ мекарданд. Ба гумонам ҳамон рӯз тамоми мардуми ҷумҳурӣ мегирист.

Ба Театри шаҳри Бохтар давида рафтам. Бо шогирдаш Ато Саидзода ба манзилаш рафта, бо дили реш - реш дуову фотиҳа хондем.

Инак, аз ба манзили охират сафар кардани дӯстам чанд моҳ сипарӣ гашта бошад ҳам, то ҳол бовар намекунам, ки дар паҳлуям  рафиқи ғамгусорам Аловуддин нест. Чӣ илоҷ? Ҳаёт аз хурсандиву шодӣ ва ғаму ғусса иборат аст. Чанд моҳ боз ними дилам ғамхонаро мемонад ва шӯхиҳояшро ба хотир оварда, дар лабонам худ аз худ табассум пайдо мешавад. 

 

Зариф ҒУЛОМ, адиб