CentralAsia (UZ). 13-14 июл Ҳукумати Ӯзбекистон ва Бонки ҷаҳонӣ мулоқоти сатҳи олиро бо иштироки  намояндагони панҷ давлати Осиёи Марказӣ баргузор намуданд. Иштирокчиён вазорату идораҳоеро, ки барои саломатии инсон, ҳайвонот, муҳити зист ва кишоварзӣ масъуланд, намояндагӣ карданд. 

Дар музокирот масъалаҳои таҳкими ҳамкориҳои минтақавӣ дар ҳифзи системаҳои ғизоӣ, пешгирии пандемия дар оянда, хуруҷи бемориҳои ҳайвоноту одамон ва муқовимат бар зидди бемориҳои сироятие, ки ба доруҳои зиддимикробӣ тобоваранд, муҳокима шуданд. Зиёда аз 50  ширкаткунанда аз кишварҳои Осиёи Марказӣ ва созмонҳои байналмилалӣ самтҳои асосии фаъолиятро дар чаҳорчӯбаи Барномаи ояндаи амал барои Осиёи Марказӣ оид ба татбиқи равиши “Саломатии ягона” баррасӣ намуданд. Дар байни онҳо роҳбарони вазоратҳо, кумитаҳои давлатӣ ва хадамоти манфиатдори Қазоқистон, Тоҷикистон,  Ӯзбекистон, Туркманистон ва Қирғизистон низ ҳастанд. Ба салоҳияти ин шахсон масъалаҳои кишоварзӣ ва амнияти озуқаворӣ, ҳифзи саломатӣ, назорати санитарию эпидемиологӣ, байторӣ, рушди чорводорӣ ва ҳифзи муҳити зист дохил мешаванд.  

 

 

 

Президенти Италия истеъфои Сарвазирро рад кард

Мир 24. Сарвазири Италия Марио Драги дар бораи қарори худ барои истеъфо додан эълом дошт. Сарвазир ин иқдоми пешбинишударо бо мавҷуд набудани иттиҳод дар парлумон, ки аз Ҳукумат пуштибонӣ намояд, шарҳ дод.

Баъдтар, маълум шуд, ки Серҷо Маттарелла, Президенти Италия, истеъфои Драгиро напазируфтааст, - гуфта мешавад дар изҳороти дафтари матбуоти Роҳбари Италия.

«Президент истеъфоро қабул накард ва аз Драги даъват ба амал овард, то дар парлумон суханронӣ ва вазъеро, ки дар натиҷаи ҷаласаи имрӯза дар Сенати ҷумҳурӣ ба вуҷуд омадааст, арзёбӣ намояд», - гуфта мешавад дар изҳорот.

 

 

 

Ӯзбекистон ва Туркманистон санадҳои нави ҳамкориро имзо карданд

CentralAsia (UZ). 14 июл дар Тошкент дар қароргоҳи «Кӯксарой» маросими имзои санадҳо аз рӯи натиҷаҳои музокироти Ӯзбекистону Туркманистон дар сатҳи олӣ баргузор гардид.

Шавкат Мирзиёев ва Сердар Бердимуҳаммадов Баёнияи муштаракро ба имзо расонданд, ки дар он созишномаҳои асосӣ ифода ёфта, вазифаҳои дарозмуддат оид ба рушди минбаъдаи ҳамкориҳои гуногунҷанба ва шарикии стратегӣ байни ду кишвар муайян шудаанд.

Дар ҳузури сарварони давлатҳо, ҳамчунин, аз ҷониби роҳбарони вазорату идораҳои ду кишвар 19 санад ба имзо расид.  

 

 

Вазирони молияи G20 дар Бали мулоқот мекунанд

INTERFAX.RU. Роҳбарони идораҳои молия ва раисони бонкҳои марказии кишварҳои G20 рӯзҳои 15-16 июл дар ҷазираи Балии Индонезия мулоқот намуда, масъалаҳои муҳими иқтисодӣ, аз ҷумла зуд беқурбшавии пул дар ҷаҳон, хатарҳои муфлисшавии давлатӣ ва чораҳои таъмини  иқтисодҳое, ки ба барқароршавии худ аз пайомадҳои COVID-19 идома медиҳанд, баррасӣ мекунанд.

Мавзуъҳои дигари баҳс оқибатҳои низоъ дар Украина ва мушкилот дар равобити ИМА бо Чин, инчунин, пешбурди ташаббусҳои ҷаҳонӣ дар соҳаи энергетикаи «сабз», бонкдории рақамӣ ва ҷорӣ намудани андози ҷаҳонии корпоративӣ мебошанд. Дар садри рӯзнома масъалаҳои рушди иқтисодӣ, яъне дастгирии барқароршавии иқтисод пас аз буҳроне, ки бар асари пандемия ба вуҷуд омадааст, қарор дорад.