Абдуҳаким Содиқов яке аз шахсиятҳоест, ки барои насли ҷавон намуна шуда метавонад. Ӯ соли 1943 дар шаҳри Душанбе таваллуд шуда, пас аз хатми мактаби миёна ва хизмати ҳарбӣ ба Омӯзишгоҳи мусиқӣ (ҳозира Коллеҷи санъати ба номи Аҳмад Бобоқулов) дохил мешавад. 

 

Пас аз хатми Омӯзишгоҳ бо роҳхати Вазорати маданият (он замон вазир Меҳрубон Назаров буд) ӯро ба  ноҳияи Панҷ барои ташкил кардани мактаби мусиқӣ ҳамчун директори он таъин намуданд. Баъди чанде фаъолияти пурсамар дар ин ноҳия ба тариқи гузариш ба Вазорати маданият ба кор даъват гардида, ҳамчун мутахассиси пешбар кор мекунад. 2 сол вазифаи директори курси такмили ихтисоси кормандони соҳаи маданиятро бар дӯш дошт. Соли 1979  ҷонишини директори Театри давлатии академии опера ва балети ба номи Садриддин Айнӣ таъин шуд. 

Эҳсос мекард, ки замона бошиддат пеш рафта истодааст ва донишҳои навро бояд аз бар намуд. Биноан, Институти давлатии санъатро низ ғоибона хатм кард. Соли 1980 Абдуҳаким Содиқовро директори Ансамбли давлатии хизматнишондодаи рақсии «Лола» таъин намуданд. Чанде баъд ба вазифаи сарвари Филармонияи давлатии Тоҷикистон ба номи Акашариф Ҷӯраев гузашт. Дар ин кохи ҳунар наздики 18 сол фаъолияти пурсамар дошт. 

Мавриди зикр аст, ки дар ин давра таҳти роҳбарии Абдуҳаким Содиқов сафарҳои ҳунарии кормандони филармония ба ҳамаи ҷумҳуриҳои собиқ Иттиҳоди Шуравӣ, аз ҷумла Россия, Украина, Белоруссия, ҷумҳуриҳои назди Балтика, Қафқоз, Осиёи Марказӣ ва хориҷи дур ба мисли Юнон, Австрия, Ҳолланд анҷом дода шуд. Аз ин сафарҳо бо як қатор ҷоизаву ифтихорнома ва сипосномаҳо баргаштанд. Ҳамзамон, дар як қатор чорабиниҳои дохилу хориҷ дар шаҳрҳои Москва ва Душанбе барномаҳои консертӣ нишон доданд. Муҳимтарини онҳо Рӯзҳои фарҳанги Тоҷикистон дар ҷумҳуриҳои Қазоқистон, Озарбойҷон, Ӯзбекистон, Ҳиндустон, «Олимпиада - 80», «40-солагии Ғалабаи СССР дар Ҷанги дуюми ҷаҳон», «60-солагии Тоҷикистон» ва дигарон мебошанд. Дар ин чорабиниҳои  сатҳи баланд ҳунармандонамон Тоҷикистонро хеле хуб муаррифӣ намуданд. 

Соли 1976 дар Филармонияи давлатӣ Ансамбли «Ганҷина» ташкил шуд, ки роҳбари бадеии даста Ҳунарпешаи халқии Тоҷикистон Зафар Нозимов ва устоди рақс Гавҳар Мирҷумъаева таъин гаштанд. 

Зиндагинома ва хизматҳои шоёни Абдуҳаким Содиқов дар рушди фарҳанги миллӣ барои насли имрӯзи фарҳангиёни кишвар намунаи ибрат аст. 

 

Абдураҳмон АВҒОНОВ