Баробари ба эътидол омадани вазъият баъд аз бемории коронавируси COVID - 19 ҳазорҳо сайёҳони хориҷиву дохилӣ барои тамошои  Помири дилнавоз, қуллаҳои сарбагардункашидаи Исмоили Сомонӣ, Абуалӣ ибни Сино, пиряхҳои азими ҳазорсолаи Федченкову Хирсон, кӯлҳои афсонавии Сарез, Қароқӯлу Зоркӯл, кӯҳҳои Зартеғ, Лаълу Шоҳи Тирандоз,  чашмаҳои оби маъдандори Гармчашма, Авҷ, Биби Фотимаи Заҳрову Ҷелондеҳ ва ҷангалҳову марғзорони соҳилҳои Панҷ, Хингову Хумбов, Ванҷобу Язгуломоб, дарёҳои Бартангу Ғунд,  Шоҳдара ва рудхонаҳои кӯҳӣ, олами нодири ҳайвонот ва парандагон ба ин сарзамини зебо ва пурасрор  меоянд, ки далели дилрабоии ин гӯшаи Тоҷикистони биҳиштосост. 

Ҳамчун рӯзноманигор бо одамони касбу кори гуногун вохӯрда, дар хусуси муҳайё будани шароит ва имкониятҳо барои рушди сайёҳӣ  пурсон мешавем. Аз ҷумла, сокини деҳаи Гишхуни ноҳияи Ванҷ Муллоҷон Муродов мегӯяд,  ки  солҳои зиёдест, ки ба шаҳри Душанбе ва дигар минтақаҳои Тоҷикистон сафар мекунад. Мушоҳида намудаанд, ки  дар даврони шуравии пурқудрат  дар канори  масири роҳи тулонии Мурғоб - Хоруғ - Ванҷ - Қалъаихумб - Шамсиддин Шоҳин - Сағирдашт - Сангвор - Нуробод ҳамагӣ чанд ошхона ва чойхонаи ҷамъияти матлубот  вуҷуд дошту халос. Аз меҳмонхонаҳо, марказҳои хизматрасонӣ, нуқтаҳои таъмири  мошинҳо нишоне набуд.  Ҳоло мебинем, ки   дар даврони соҳибистиқлолии Ватан танҳо дар ноҳияи Дарвоз, ки дарвозаи қисми ғарбии Вилояти Мухтори Кӯҳистони Бадахшон мебошад, даҳҳо  иншооти самти иҷтимоӣ, меҳмонхонаҳо, тарабхонаву қаҳвахонаҳо, ошхонаю чойхонаҳо,  марказҳои хизматрасонӣ ва истироҳатгоҳҳо бунёд гардиданд. Ҳамчунин, симои  марказ ва деҳаҳои ин гӯшаи диёри бостонӣ  ба куллӣ дигаргун ва дар маҷмуъ, инфрасохтори деҳот ба куллӣ тағйир  ёфтааст. 

Истироҳатгоҳҳои «Чорчаман», «Чаманистон»-и  мавзеъҳои Паткуноб ва Яхчисор, қаҳвахонаҳо ва чойхонаҳои   лаби оби Хумбов, таги чанорҳои шаҳраки Қалъаихумб ва рустоҳои Хостав, Кеврону Ҷорф ва  Курговад, марказҳои хизматрасонии Ново ва Сафедорон, ки бунёдгузорони аввалинашон роҳсозон мебошанд,  ба ҳар як таърифу тавсиф меарзанд. Дар ҳақиқат симои   канори роҳҳои мошингард  бо ёрии Мақомоти иҷроияи ҳокимияти давлатии Вилояти Мухтори Кӯҳистони Бадахшон, Ҳукумати ҷумҳурӣ ва ҳиммати баланди соҳибкорону заҳмати коргарони  идораҳои роҳдорӣ  ба  куллӣ рӯ ба беҳбудӣ овардааст. 

Сайёҳони хориҷиву ватанӣ, ронандагону мусофирон аз он изҳори хушнудӣ менамоянд, ки   бунёди  қитъаҳои  роҳи  Кӯлоб - Шамсиддин Шоҳин ва  Дашти Ёгед - Қалъаихумб  аз ҷониби роҳсозони  Ҷумҳурии Мардумии Чин ва тоҷик бомуваффақият ба анҷом расид. Аз рӯи лоиҳа дар шафати шоҳроҳ  даҳҳо  иншооти самти хизматрасонӣ  барои фароғати ҷаҳонгардони хориҷиву ватанӣ ва ронандагону мусофирон бунёд шудаанд. Аз ҷумла, собиқадори соҳаи роҳдорӣ Сулаймон Муллоёров бо ҳамроҳии бародараш Давлатхон Муллоёров, директори мамнуъгоҳи «Сайёд»,  дар як макони хушманзараи мавзеи Тангнои Дарвоз маҷмааи сеошёнаи  хизматрасонии дорои меҳмонхона, ошхона, таъмиргоҳи  нақлиёти автомобилиро бунёд карданд. 

Набераи  яке аз аввалин роҳсозони дарвозӣ Аваз Амирбеков  Нуралӣ Санканов дар лаби рӯдхонаи Курговадоб, майдони таги чанорҳои бобои шуҳратмандаш меҳмонхона, қаҳвахонаву мағоза сохтааст. Ин ҷо макони хуби дамгирӣ ва истироҳатӣ барои  сайёҳон гардидааст. 

Ба гуфтаи сардори Муассисаи давлатии «Идораи хоҷагии роҳҳои автомобилгарди Вилояти Мухтори Кӯҳистони Бадахшон» Далер Мукаррамшоев, бо супориши Президенти Ҷумҳурии Тоҷикистон муҳтарам Эмомалӣ Раҳмон таҷдиди роҳи мошингарди қитъаи аз ҳама мушкилгузари  Қалъаихумб - Ванҷ то дарвозаи ноҳияи Рӯшон, ки 109 километрро ташкил медиҳад, оғоз гардид. Дар доираи  сазовор истиқбол гирифтани Ҷашни 35-солагии Истиқлоли давлатии Ҷумҳурии  Тоҷикистон  бунёди ин роҳ сафари  гардишгарони хориҷӣ ва ватаниро ба Бадахшон - сарзамини зебо ва пурасрор, дарвозаи тиллоии Тоҷикистон осонтар ва бехавфу хатар менамояд.                                                    

 

Муҳаммадзоиршо ШАРИФЗОДА, «Ҷумҳурият»,

Сироншоҳи ДИЛОВАР, рӯзноманигор