Дар ҷумҳурӣ давоми чанд рӯзи ахир ҳарорати ҳаво то 47 дараҷа баланд аст. Обуҳавошиносон идома ёфтани чунин гармиро то 28 июл пешгӯӣ менамоянд, ки дараҷаи рекордӣ арзёбӣ мешавад. Яъне, ҳарорати ҳаво дар вилояти Хатлон аз 42 то 47, ноҳияҳои тобеи ҷумҳурӣ - 40 то 44, вилояти Суғд то 43 ва, ҳатто, дар водиҳо - Дарвоз то 42 дараҷа гарм хоҳад шуд. 

Дар ин бора Ҷамила Байдуллоева, муовини директори Агентии обуҳавошиносии Кумитаи ҳифзи муҳити зист иттилоъ дод. 

Ба гуфтаи номбурда, сабаби асосии гарм шудани ҳарорати ҳаво дар ҷумҳурӣ аз тарафи шимоли Африқо, ки самти анбуҳи ҳаво кушода буд, пайдарпай дохил шудани гармӣ мебошад. Чунин вазъи обу ҳаво на танҳо дар кишвари мо, балки дар қисми зиёди минтақаи Осиёи Марказӣ - кишварҳои Ӯзбекистон, Туркманистон, қисман Қирғизистон, инчунин, Қафқоз ва Аврупо низ ба амал омадааст. Аз 16 июл то имрӯз ҳаво ниҳоят хушк ва дар маҳалҳо хеле гарм шудааст. Асосан, дар се минтақа баландтарин ҳарорат ба назар мерасад, ки дар тули 80 сол мушоҳида нашуда буд. Ин минтақаи Кӯлоб бо гармии то 44 дараҷа, Дарвоз то 42 ва шаҳри Душанбе  44 дараҷа гарм мебошад. Дар дигар минтақаҳо ҳарорати ҳаво ҳарчанд гарм бошад ҳам, на зиёда аз 40 дараҷа аст. 

Мутахассисон гармии имсоларо нисбат ба солҳои пешӣ фарқкунанда меҳисобанд ва тафовут дар он аст, ки имсол гармӣ бисёр тул кашида, хавфи зиёд ба бор дорад. Соли гузашта низ, чунин анбуҳи ҳаво аз минтақаҳои болозикр ворид шуда буд, аммо он танҳо аз се то панҷ рӯз давом кард. Анбуҳи ҳавои имсола фақат гарм аст. Онро обуҳавосанҷон сиклоне бе фронти атмосферӣ ном мебаранд. Яъне, ҳар минтақа дорои сиклонҳои ба худ хос буда, таркиби онҳо аз ҳавои намнок, ҳаракат кардани фронтҳои атмосферӣ (фронт, яъне аз ҳамдигар ҷудо шудани ҳавои гарм ва хунук) ва пайдо гаштани шамолу боридани жола, раъду барқ ва боронҳо иборатанд. Сиклони бе фронти атмосферӣ - сиклони баръакси инҳо мебошад, ки дар фасли тобистон аз ҷануб ва қисман аз ғарб ҳаракат карда истодааст ва эҳтимоли паст шудани чунин ҷараён баъди 31 июл вуҷуд дорад. Бинобар ин, дар давраи баланд гардидани ҳарорати ҳаво сокинони кишварро зарур аст, тамоми маслиҳату тавсияҳои мутахассисони соҳаи обуҳавошиносӣ, тандурустӣ, ҳолатҳои фавқулода ва кишоварзиро ба инобат гирифта, онҳоро дуруст ва ҳатман иҷро намоянд. Масалан, барои ҳифзи саломатии аҳолӣ тавсияи табибон оид ба муваққатан худдорӣ кардан аз оббозӣ ва безарурат набаромадан аз хона бояд риоя гардад. Барои беталаф парвариш кардани маҳсулоти кишоварзӣ низ, роҳҳои пешгирии он тариқи обёрии бештар тавсия дода мешавад ва ғайра. 

 

Оҳистамоҳ ВАФОБЕК, 

«Ҷумҳурият»