Вазорати кишоварзии Ҷумҳурии Тоҷикистон аз ҳамкорӣ бо рӯзномаи "Ҷумҳурият" арзи сипос менамояд. Ҳамзамон, иттилоъ медиҳад, ки мақолаи хабарнигори рӯзнома Кароматулло Ато зери унвони «Парандапарварӣ. Дастовардҳо зиёд, вале мушкилот ҳам кам нест!», ки дар рӯзномаи «Ҷумҳурият» аз 4 июли соли 2022, № 126 (24 485) нашр гардидааст, мавриди баррасӣ қарор дода шуд.

 

Дар иртибот ба навиштаи мазкур гуфтанием, ки воқеан, баробари рушди ҳар соҳа мушкилот низ ҷой дорад. Ҳоло мушкилоти асосии соҳаи парандапарварӣ гарон будани арзиши хӯроки омехтаи паранда мебошад, зеро он аз хориҷи кишвар ворид мешавад, ки вазъи иқтисодии баамаломадаи  давлатҳо ба воридоти маҳсулот  таъсир мегузорад.  

Мувофиқи маълумоти расонаҳо, имсол дар бисёр мамлакатҳо истеҳсоли ғалладона, аз ҷумла гандум, чанд маротиб кам гаштааст. Гарон шудани нархи сӯзишворӣ ва минералҳо, ки дар таркиби хӯроки паранда истифода мешаванд, омили дигари қиматшавӣ мебошад. Ҳамаи ин ба арзиши аслии хӯроки омехтаи паранда таъсир мерасонад.

КВД «Саноати парандапарварии Тоҷикистон»-и Вазорати кишоварзӣ кӯшиш ба харҷ медиҳад, ки аз ҳамаи сарчашмаҳо самараноку мақсаднок истифода намуда, саршумори паранда ва ҳаҷми истеҳсоли маҳсулоти соҳаро зиёд намояд. Барои рафъи мушкилоти ҷойдоштаи соҳа ва рушди он ҳамкориҳо бо олимон  зич ба роҳ монда шудааст. 

Бо мақсади пешрафти бахши парандапарварии  ҷумҳурӣ, ҳамчунин, лозим аст, ки корхонаҳои давлатии зотпарварӣ оид ба истеҳсоли тухми инкубатсионӣ ва чӯҷаҳои хушзоти якрӯза ташкил карда шавад. Ҳамзамон, дар назди КВД «Саноати парандапарварии Тоҷикистон» ташкил намудани озмоишгоҳи махсус барои ташхиси саривақтии бемориҳо ва аз санҷиш гузарондани сифати маҳсулоти соҳаи паранда талаботи замон аст.

Вобаста ба ин, Вазорати кишоварзӣ ва КВД «Саноати парандапарварии Тоҷикистон» якҷо бо роҳбарони корхонаҳои парандапарварии ҷумҳурӣ мақсад гузоштаанд, ки ҷиҳати истеҳсоли бештари тухму гӯшти паранда аз тамоми иқтидору имкониятҳои мавҷуда самаранок истифода намуда, иҷрои дурнамои соли равонро ба пуррагӣ таъмин намоянд.

 

М. Б. МИРЗОЗОДА,

муовини якуми вазири кишоварзӣ