Ҳар сол фасли тобистон масъулони Мақомоти иҷроияи маҳаллии ҳокимияти давлатии ноҳияи Ховалинг дар қатори дигар мақомотҳои маҳалливу шаҳрӣ дар таъмини истироҳати самарабахши хонандагону  наврасон дар истироҳатгоҳҳо ва муҳайёсозии шароит дар назди муассисаҳои таълимӣ муваззаф мегарданд.   

 

Тавре Муҳаммадназар Амирсаидов,  мудири шуъбаи маорифи ноҳия, ба мо иттилоъ дод, - имсол низ чун солҳои гузашта истироҳати тобистонаи хонандагон дар ду баст ташкил  ва дар  назди 35 муассисаи таълимӣ,  дар маҷмуъ,  наздики   2000  мактаббача ба истироҳат фаро гирифта шудааст. Ба онҳо 380 омӯзгори пуртаҷриба вобаста шудааст. Роҳбарияти  Корхонаи    «Тиллои тоҷик»  амали хайреро  пеш гирифта, бо маблағгузории хеш   истироҳати  150  хонандаро дар назди Муассисаи таҳсилоти миёнаи умумии № 7 ташкил намуд. Онҳо се вақт бо хӯроки гарм таъмин буда, саломатии онҳо таҳти назорати доимии табибон қарор дорад. 6 хонандаамон  дар дараи Варзоб - маҷмааи фарҳангию фароғатии «Файзи истиқлол» - и Иттифоқи касабаи кормандони соҳаи маориф ва илми кишвар  истироҳаташро   сипарӣ намуд. 

Кормандони хадамоти оташнишонӣ тамоми лавозимоту таҷҳизоти  оташнишониро дар ҳолати коршоям  нигоҳ дошта, баҳри пешгирӣ  аз ҳолатҳои фавқулода  бо  хонандагон  суҳбату вохӯриҳо мегузаронанд.  Ҳамзамон, дар ҳамаи истироҳатгоҳҳои ноҳия миёни хонандагон озмуни «Китобхони  беҳтарин»  идома меёбад. Мақсад аз ташкили  чунин озмунҳо баланд бардоштани шавқу ҳаваси хонандагон ба хондани китобҳои бадеӣ ва аз худ кардани ашъори адибон  мебошад. Дар истироҳатгоҳҳои наздимуассисавӣ барномаҳои таълимию тарбиявӣ низ роҳандозӣ шудаанд. 

-  Мо  на танҳо баланд бардоштани  донишу зеҳнияти хонандагонро  ба назар гирифта, озмуни  «Китобхони беҳтарин» -ро  гузарондем, боз дар байни хонандагон  намудҳои варзишии футболу волейбол, баскетбол, тенниси рӯи миз, шашкаву шоҳмотро  низ  хеле ҷолиб роҳандозӣ намудаем,  то ки   истироҳаташон   хотирмон    гузарад, - гуфт дар анҷоми суҳбат  М. Амирсаидов. 

 

Холназар КАСИРОВ, 

«Ҷумҳурият»