Узви вобастаи Академияи муҳандисии Ҷумҳурии Тоҷикистон, доктори илми иқтисод, профессор Раҷаб Раҷабов аъзои ҳайати таҳририяи маҷаллаи «Finance and Management»-и Донишгоҳи Вармину Мазури Лаҳистон, муаллифи зиёда аз 300 монография, китоби дарсӣ, дастурҳои таълимӣ ва мақолаҳои илмӣ мебошад. Таҳти роҳбарии ӯ 4 доктори илми иқтисод, 1 доктори илмҳои техникӣ ва зиёда аз 40 номзади илми иқтисод рисолаҳои илмӣ дифоъ намудаанд. 

Мавсуф дорандаи сертификати байналхалқӣ доир ба гумрук мебошад. Китобаш «Ҷанбаъҳои минтақавии рушди соҳаи хизматрасониҳои пулакӣ ба аҳолӣ дар шароити гузаришҳои иқтисодӣ”, ки соли 2013 дар нашриёти «Ирфон» чоп шудааст, дар Озмуни байналмилалии «Китоби макотиби олии Авруосиё» (бахши китобҳои иқтисодӣ) беҳтарин дониста шуд. 

Қариб тамоми нақшаҳои таълимӣ, барномаи фанҳои тахассусӣ, дастурҳои таълимӣ ва китобҳои дарсӣ барои ихтисоси фаъолияти гумрукӣ ба қалами ӯ тааллуқ доранд. 

Соли 2003 бо ташаббуси ӯ дастаи «SIFE»-и донишҷӯёни Донишгоҳи давлатии тиҷорати Тоҷикистон ташкил шуд. Дар он зиёда аз 140 лоиҳа коркард шуда, дар чемпионати миллӣ ҳам, иштирок намуданд. 35 лоиҳаи пешниҳоднамудаи онҳо соҳиби ҷоиза гардид. Даста чемпиони Тоҷикистон гардида, 11 - 13 сентябри соли 2006 дар Париж дар чемпионати ҷаҳон аз номи Тоҷикистон баромад намуд. Намояндагони даста, ҳамчунин, соли 2009 кишварро дар Олмон муаррифӣ намуда соҳиби медал ва ҷом гардиданд.

Р. Раҷабов дар кори зиёда аз 130 конфронсияи байналхалқӣ, ҷумҳуриявӣ, шаҳрӣ ва донишгоҳӣ иштирок намудааст. 

Ӯ узви Шурои диссертатсионӣ оид ба ҳимояи рисолаҳои доктории Пажӯҳишгоҳи таҳқиқотҳои иқтисодии Вазорати иқтисодиёт ва савдои Тоҷикистон (2003 - 2004), узв ва котиби Шурои диссертатсионии назди ДДТТ (1998 - 2000, 2003 - 2004 ва 2005 - 2012) буд. Аз соли 2003 то ба соли 2008 котибии Шурои ректорони Тоҷикистон буд. Ҳоло раиси Шурои диссертатсионии назди Донишгоҳи давлатии тиҷорати Тоҷикистон мебошад.

Ҳолномаи устод таҷассумгари ҳаёти ибратбахш барои ҳар фарди ҷомеа аст. 

 

Суҳбатулло ҲИКМАТОВ, мудири кафедраи фаъолияти гумруки ДДТТ, номзади илми иқтисод, 

Нигора МАЪРУФОВА, устоди ДДТТ, номзади илми иқтисод