1-уми сентябр суҳбати телефонии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Дабири кулли Созмони Милали Муттаҳид муҳтарам Антониу Гутерриш доир гардид.

 

Дар рафти суҳбат ҷонибҳо атрофи ҳолати кунунӣ ва ояндаи ҳамкориҳои Тоҷикистон ва Созмони Милали Муттаҳид мубодилаи афкор намуданд.

Дар зимн, маҷмуи масъалаҳои мубрами рушди устувор, таъмини сулҳу субот ва амнияти минтақавӣ баррасӣ гардиданд. Пешвои миллат омодагии ҷониби Тоҷикистонро ҷиҳати идомаи  ҳамкориҳои созанда бо Созмони Милали Муттаҳид ва ниҳодҳои сохтории он дар самтҳои мазкур иброз доштанд.   

Ҳамчунин,  вазъи имрӯзаи Афғонистон,  масъалаҳои вобаста ба тақвияти сарҳадоти Тоҷикистон бо ин кишвари ҳамҷавор ва идомаи расондани кумакҳои башарӣ ба мардуми азияткашидаи он мавриди таваҷҷуҳ қарор гирифтанд.

Дар хотимаи суҳбат Дабири кулли Созмони Милали Муттаҳид ба сиёсати мутавозин ва мавқеи оқилонаи Сарвари давлат ҷиҳати дарёфти роҳҳои ҳаллу фасли масъалаҳои рӯзмарраи минтақавӣ ва байналмилалӣ баҳои баланд дод.