Имсол низ мардуми шарафманди тоҷик чун солҳои қаблӣ солгарди навбатии Истиқлоли давлатиро дар фазои сулҳу суботи комил ва руҳияи созандагӣ таҷлил хоҳанд кард. Ҳоло ба ин муносибат, корҳои ободониву созандагӣ вусъати бештар касб намуда, ҳар рӯз дар гӯшаву канори мамлакат даҳҳо коргоҳу иншооти нав мавриди истифода қарор мегиранд.

 

Таърих борҳо собит намудааст, ки таҳаввулоти бунёдӣ дар умури сиёсиву иҷтимоӣ ва давлатдории миллӣ бо номи шахсиятҳое пайванд мегирад, ки бо корномаҳои бузургашон ормонҳои мардумиро дар худ таҷассум намуда, дар моварои тамаддуни башарӣ ҷойгоҳи миллати хешро таҳкиму тавсеа мебахшанд. Дар таърихи давлатдории навини тоҷикон чунин абармарди давлатсоз дар симои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар саҳнаи сиёсӣ ба зуҳур омад, ки рукнҳои давлатдориро аз сифр оғозу таҳким бахшида, Тоҷикистонро то ба сатҳи як кишвари таъсиргузор дар сиёсати байналмилалӣ ба ҷаҳониён муаррифӣ намуданд. Ин аст, ки, агар мо дар бораи Истиқлоли давлатӣ ва дастовардҳои беназири он ҳарфе ба забон оварем, беихтиёр номи шарафманди Пешвои муаззами миллат дар миён аст. 

Дар замони Истиқлоли давлатӣ чун дигар самту соҳаҳо таҳкими фаъолияти мақомоти судӣ низ ҳамеша дар меҳвари таваҷҷуҳи Президенти мамлакат муҳтарам Эмомалӣ Раҳмон қарор гирифта, ба манзури таъмини адолати судӣ корҳои зиёде анҷом ёфтанд. Чунончи, қабул ва татбиқи Барномаи ислоҳоти судӣ – ҳуқуқӣ, ки аз соли 2007 шуруъ шуда, дар чанд марҳила амалӣ шуд, маҳз бо эҳтимоми Пешвои муаззами миллат сурат гирифта, дар шаклгирии низоми боадолатона ва таҳкими сохтори судӣ нақши муассир гузошт. Боиси қаноатмандист, ки дар доираи татбиқи ин барномаҳо барои беҳтар кардани вазъи иҷтимоии мақомоти судӣ, фаъолияти судяҳо ва таъмини мустақилияти онҳо чораҳои зарурӣ андешида шуданд. Ин амр ба он мусоидат кард, ки дар умум кормандони мақомоти судӣ зимни иҷрои рисолати худ масъулияти баланд нишон дода, фаъолияташонро дар доираи талаботи қонунгузорӣ ва ҷавобгӯ ба меъёрҳои ҷомеаи адолатпеша ба роҳ монанд.

Президенти Ҷумҳурии Тоҷикистон муҳтарам Эмомалӣ Раҳмон ҳанӯз зимни ироаи Паём ба Маҷлиси Олӣ аз 26 декабри соли 2019 ба баланд бардоштани маърифати ҳуқуқии шаҳрвандон таъкид намуда, қабули барномаи нави таълим ва тарбияи ҳуқуқии шаҳрвандонро барои даҳсолаҳои минбаъда зарур шумурданд: «Тавре ки маълум аст, баланд бардоштани сатҳи маърифати ҳуқуқии аҳолӣ омили асосии эъмори давлати ҳуқуқбунёд, ҷомеаи шаҳрвандӣ ва таъмин намудани волоияти қонун мебошад. Бинобар ба охир расидани муҳлати Барномаи таълим ва тарбияи ҳуқуқии шаҳрвандон барои солҳои 2009 - 2019, зарур мешуморам, ки барои даҳсолаи минбаъда барномаи нав таҳия ва қабул карда шавад».

Албатта чунин дастур, дар шароите, ки ҷомеаи ҷаҳониро зуҳуроти номатлубе ба монанди терроризму ифротгароӣ, ҷинояту ҷинояткорӣ фаро гирифта, боиси нигаронии аҳли башар гардидааст, басо муҳиму зарурист. Таълиму тарбияи ҳуқуқӣ дар болоравии маърифати ҳуқуқии шаҳрвандон мусоидат карда, ба паст гардидани таҳдиду хатарҳо, пешгирии шомилшавӣ ба созмону гурӯҳҳои иртиҷоӣ, ҷинояту ҷинояткорӣ нақши назаррас дорад. Гузашта аз ин, маърифати ҳуқуқиву зиракии сиёсӣ имкон медиҳад, ки мо дар ҳифзу таҳкими Истиқлоли давлатӣ, ваҳдати миллӣ муваффақ бошем ва нагузорем, ки гурӯҳҳои тахрибкор фазои орому осудаи кишварро халалдор созанд.

 

Даврон НАЗИРМАДЗОДА, 

корманди дастгоҳи суди шаҳри Душанбе