15-уми сентябр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳошияи ҷаласаи Шурои сарварони давлатҳои аъзои Созмони ҳамкории Шанхай дар шаҳри Самарқанд дар маросими ниҳолшинонӣ иштирок карда, аз маҷмааи фарҳангию этнографии “Шаҳри абадӣ” боздид ба амал оварданд.

Нахуст, Президенти мамлакат муҳтарам Эмомалӣ Раҳмон  бо  сарварони  давлатҳои  аъзо  ва нозири Созмони ҳамкории Шанхай дар ҳудуди “Конгресс-ҳолл” бо умеди рушду шукуфоии кишвари дӯсту ҳамсояи Ӯзбекистон ва саодатмандии ҳарчи бештари мардуми бародари ӯзбек ниҳоли дӯстӣ шинонданд.

Сипас, Сарвари давлат муҳтарам Эмомалӣ Раҳмон ҳамроҳи Роҳбари Ӯзбекистон Шавкат Мирзиёев ва сарварони давлатҳои аъзо ва нозири Созмони ҳамкории Шанхай ба маҷмааи фарҳангию этнографии “Шаҳри абадӣ” ташриф оварда, бо имкониятҳои сайёҳии он шинос шуданд.

Дар “Шаҳри абадӣ” маҷмааи сайёҳии “Роҳи бузурги абрешим” ташкил гардидааст, ки он аз маркази байналмилалии “Конгресс-ҳолл” бо 3500 ҷой, ҳашт меҳмонхона, парки таърихию этнографии “Шаҳри абадӣ”, кӯл ва дарахтони гуногун иборат мебошад.

Иттилоъ дода шуд, ки маҷмааи фарҳангию этнографии “Шаҳри абадӣ” дар масоҳати 120 гектар доман густурда, соли равон ба ифтихори баргузории ҷаласаи Шурои сарварони давлатҳои аъзои Созмони ҳамкории Шанхай ифтитоҳ гардид.

Маҷмааи таърихию этнографии “Шаҳри абадӣ” як намунаи шаҳри бостонии Самарқанд мебошад.

Сайёҳон дар ин ҷо имкон доранд, ки ҳангоми тамошои кӯчаҳо бо таъриху фарҳанг ва маданияти мардуми шаҳри қадима шинос шаванд.

Аз ҷониби ҳунармандони театр дар маҷмаа барномаҳои рангини консертӣ ва намоишномаҳо пешкаш мешаванд.

Маҷмаа, ҳамчунин, муаррифгари ҳунарҳои мардумӣ ва таомҳои миллии минтақаҳои гуногуни Ӯзбекистон буда, меҳмонон имкон доранд, барои хотира маҳсули дасти ҳунармандонро бихаранд.