Ҷумҳурии Тоҷикистон дар партави сиёсати хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тавассути сиёсати хориҷии мутавозин, ки меҳвари онро сиёсати «дарҳои боз» ташкил медиҳад, бо соири кишварҳои ҷаҳон равобити неку ҳасанаро ба роҳ монда, мавқеъ ва ҷойгоҳи худро дар низоми нави муносибатҳои байналмилалӣ сол ба сол таҳким мебахшад. Зимнан, дар сиёсати хориҷии Тоҷикистон ба рушди пайвастаи муносибот бо кишварҳои Иттиҳоди Давлатҳои Мустақил, аз ҷумла Беларус, афзалияти хос дода мешавад, ки ин амр ба густариши ҳамкориҳо байни ду давлат мусоидат намудааст.

Аз оғози муносибатҳои дипломатӣ байни Ҷумҳурии Тоҷикистон ва Ҷумҳурии Беларус, ки моҳи сентябри соли 1996 барқарор гардид, зиёда аз 90 аҳднома ва созишнома ба имзо расидаанд, ки барои пешбурд ва таҳкими муносибатҳои мутақобилан судманд дар соҳаҳои сиёсӣ, иқтисодиву тиҷоратӣ, фарҳангию гуманитарӣ ва дигар соҳаҳо созгор мебошанд. Ин дар ҳолест, ки пас аз истиқрори муносибатҳои дипломатӣ, соли 1997 Сафорати Ҷумҳурии Тоҷикистон дар Ҷумҳурии Беларус таъсис ёфта, соли 2011 Сафорати Ҷумҳурии Беларус дар Ҷумҳурии Тоҷикистон ба фаъолият шуруъ намуд.

Бар пояи иттилои Вазорати корҳои хориҷӣ, санадҳои бунёдгузоре, ки принсипҳои асосии муносибатҳои дуҷонибаро байни ду давлат муайян менамоянд, ин Аҳдномаи дӯстӣ ва ҳамкорӣ байни Тоҷикистону Беларус аз 5 апрели соли 2000 ва Аҳдномаи шарикии стратегӣ байни Тоҷикистон ва Беларус аз 27 июни соли 2019 ба ҳисоб мераванд. Ба гуфтаи манбаъ, муносибатҳои Тоҷикистон ва Беларус дар марҳилаи муосир хислати рушди бомаромро ҳам дар сатҳи дуҷониба ва ҳам бисёрҷониба касб намуда, муколамаи фаъоли сиёсӣ дар сатҳи олӣ ба ин муносибатҳо такони мусбат мебахшад. Ин нукта ҳам таъкид мешавад, ҷиҳати густариши ҳамаҷонибаи ҳамкориҳо байни Тоҷикистон ва Беларус сафарҳои мутақобилаи сарварони ду давлат нақши хосса доранд. Чунончи, сафари расмии Президенти Ҷумҳурии Беларус Александр Лукашенко ба Ҷумҳурии Тоҷикистон 14 – 16 майи соли 2018 ва сафари расмии ҷавобии Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Беларус 27 – 30 июни соли 2019 дар таърихи муносибатҳои ду кишвар саҳифаи навро боз намуданд.

Мавқеъҳои ҳар ду кишвар нисбат ба аксар масъалаҳои рӯзмарраи байналмилалӣ ва минтақавӣ ҳамсон ё наздик буда, Тоҷикистону Беларус дар доираи созмонҳои бонуфуз, ба монанди Созмони Милали Муттаҳид, Иттиҳоди Давлатҳои Мустақил ва Созмони Аҳдномаи амнияти дастаҷамъӣ робитаҳои хубро ба роҳ мондаанд.

Маҷмуи муносибатҳои дуҷониба ба ояндаи дарозмуҳлат равона гардидаанд, ки фаъолияти Комиссияи байниҳукуматии Тоҷикистону Беларус оид ба масъалаҳои ҳамкориҳои иқтисодию тиҷоратӣ дар самти муайян намудани дурнамо ва рушди минбаъдаи он таконбахш аст. Қобили зикр аст, ки илова ба фаъолияти ин Комиссия соли 2011 аз ҷониби Палатаи савдо ва саноати Ҷумҳурии Тоҷикистон ва Палатаи савдо ва саноати Ҷумҳурии Беларус Шурои тиҷоратии Тоҷикистон ва Беларус таъсис ёфт.

Айни замон, баргузории ҳамоишҳои фарҳангии муштарак бо ширкати ходимони фарҳанг ва ҳунари ду давлат ба анъанаи нек табдил ёфтааст. Дар ин росто, мунтазам баргузории рӯзҳои фарҳанги Ҷумҳурии Беларус дар Ҷумҳурии Тоҷикистон ва рӯзҳои фарҳанги Ҷумҳурии Тоҷикистон дар Ҷумҳурии Беларус муҳим арзёбӣ мешаванд.

Ҳоло интизор меравад, ки дар доираи сафари расмии Президенти Ҷумҳурии Беларус Александр Лукашенко ба Ҷумҳурии Тоҷикистон (11 – 12 октябр) санадҳои нави ҳамкорӣ ба тасвиб расида, ин сафар дар рушду тавсеаи минбаъдаи ҳамкориҳои мутақобилан судманд байни ду кишвари бо ҳам дӯст саҳифаи наверо рақам хоҳад зад.

 

Фирӯз РАҲМОНИЁН, «Ҷумҳурият»