Директори идорӣ оид ба фаъолияти амалиётии Бонки ҷаҳонӣ Аксел ван Тротсенбург, ноиби президенти ҳамин бонк Анна Бйерде, ҳайати ҳамроҳонаш ва намояндагони Ҳукумати Ҷумҳурии Тоҷикистон - муовини Сарвазир Матлубахон Сатториён, вазири молия Файзиддин Қаҳҳорзода, муовини вазири тандурустӣ ва ҳифзи иҷтимоии аҳолӣ Шодихон Ҷамшед ва муовини вазири кишоварзӣ Нигина Анварӣ ба ноҳияи Файзобод ташриф оварданд.

Мақсади ташрифи меҳмонон - ин таҳкими ҳамкориҳо миёни Мақомоти иҷроияи маҳаллии ҳокимияти давлатии ноҳияи Файзобод ва Бонки ҷаҳонӣ маҳсуб меёбад. Дар доираи сафар меҳмонон аз иншооте, ки бо маблағгузории Бонки ҷаҳонӣ дар доираи Ҷашни 30-солагии Истиқлоли давлатии Ҷумҳурии Тоҷикистон бунёд ёфтааст, дидан намуданд.

Нахуст, меҳмонон аз маҳсулоти кишоварзӣ, ҳунарҳои мардумӣ ва  корхонаву коргоҳҳои ҳудуди ноҳия боздид карданд. Сипас, бо шароити маркази саломатии деҳаи Дубедаи Ҷамоати деҳоти Ҷавонон ошно гардида, ба сохтмони он баҳои баланд доданд. Иншооти мазкур аз  9 ҳуҷраи корӣ иборат буда, дар он 7 нафар кор мекунад. Маркази саломатӣ бо тамоми шароити замонавӣ аз тарафи Бонки ҷаҳонӣ бо маблағи беш аз 150 ҳазор доллари ИМА бунёд шудааст.

Инчунин, аз лоиҳаи тиҷоратикунонӣ ва ҳосилнокии кишоварзӣ - “нигоҳдории себ ва нок пас аз ҷамъоварӣ” дар деҳаи Гултеппаи Ҷамоати шаҳраки “30-солагии Истиқлол”- и ноҳия боздид ба амал оварданд.

Анбори нигоҳдории себу ноки хоҷагии деҳқонии “Хайриддин” дорои ғунҷоиши беш аз 300 тонна мева мебошад. Анбори мазкур бо маблағи наздик ба 700 ҳазор сомонӣ бунёд гашта, 250 ҳазор сомонии онро гранти хориҷӣ ташкил медиҳад. 

Имрӯз Хоҷагии деҳқонии “Хайриддин” яке аз хоҷагиҳои пешқадам дар ноҳия ба шумор рафта, ҷиҳати таъмини меваи хушсифат дар ноҳия ва берун аз он саҳми калон дорад. Айни замон дар Хоҷагӣ беш аз 25 нафар кор мекунад, ки аз ин 12 нафар зан мебошад. Масоҳати умумии боғи себу нок 28 гектарро ташкил медиҳад. 

Аксел ван Тротсенбург барои ҳамкориҳои судманд бо сипосномаи  Мақомоти иҷроияи маҳаллии ҳокимияти давлатии ноҳияи Файзобод ва туҳфаҳои хотиравӣ қадр гардид.

 

З. РАҶАБ, “Ҷумҳурият”